188. ආදායසත්තකකථා

311. න පච්චෙස්සන්ති එත්ථ පතීත්‍යූපසග්ගස්ස පුනත්ථං, ඉධාතුයා ච ගත්‍යත්ථං දස්සෙන්තො ආහ ‘‘න පුන ආගමිස්ස’’න්ති. එවං පක්කමතො ඡිජ්ජතීති සම්බන්ධො.

එතඤ්චාති පක්කමනන්තිකං, කථිනුද්ධාරඤ්ච. තාහන්ති තෙ අහං. තෙති තුය්හං.

අඤ්ඤන්ති අත්තනො විහාරතො අඤ්ඤං. එවං හොතීති එසො පරිවිතක්කො හොති. සොති ආවාසපලිබොධො. ආදිච්චබන්ධුනා වුත්තොති යොජනා.

ද්වෙ පලිබොධා එකතො ඡිජ්ජන්තීති සම්බන්ධො. අපුබ්බං අචරිමන්ති එකපහාරෙනෙව. සො පලිබොධූපච්ඡෙදො කස්මා විත්ථාරතො න වුත්තොති ආහ ‘‘සො පනා’’තිආදි. සො පනාති පලිබොධූපච්ඡෙදො පන. න වුත්තොති සම්බන්ධො. එත්ථාති ඉමස්මිං කථිනුබ්භාරෙ. කස්මා අයං කථිනුද්ධාරො ‘‘නාසනන්තිකො’’ති වුත්තොති ආහ ‘‘යස්මා’’තිආදි. තස්සාති භික්ඛුනො.

ආසාවච්ඡෙදිකෙ ඡිජ්ජතීති සම්බන්ධො. අයං පනාති ආසාවච්ඡෙදිකො කථිනුද්ධාරො පන. අනෙකපභෙදො හොතීති සම්බන්ධො. තස්සාති භික්ඛුස්ස. වුත්තොති අයං ආසාවච්ඡෙදිකො කථිනුද්ධාරො වුත්තොති යොජනා. එත්ථ පනාති ඉමස්මිං පන ඨානෙ. තත්ථාති සීමාතික්කන්තිකෙ.

312-325. එවන්තිආදි නිගමනං. සත්තකෙති අට්ඨසු මාතිකාසු ආසාවච්ඡෙදතො සෙසෙ සත්තපමාණෙ, සත්තසමූහෙ වා. තෙයෙවාති සත්තකෙ එව. තතොති වාරතො. යෙ යෙති කථිනුද්ධාරා. ඉතරෙහීති ආසාවච්ඡෙදතො අඤ්ඤෙහි. යෙ පලිබොධා වුත්තාති සම්බන්ධො. ආවාසො චජීයති අනෙනාති චත්තන්ති වචනත්ථං දස්සෙන්තො ආහ ‘‘යෙන චිත්තෙනා’’තිආදි. තන්ති චිත්තං. ‘‘එසෙව නයො’’ති ඉමිනා ආවාසො වමීයති අනෙනාති වන්තං. ආවාසතො මුච්චති අනෙනාති මුත්තන්ති වචනත්ථං අතිදිසති. සබ්බත්ථාති සබ්බස්මිං කථිනක්ඛන්ධකෙ.

ඉති කථිනක්ඛන්ධකවණ්ණනාය යොජනා සමත්තා.