169. හත්ථිමංසාදිපටික්ඛෙපකථා

281. අරඤ්ඤකොකා නාමාති සසබිළාලාදයො සත්තෙ ඛාදනත්ථාය කුකති ආදදාතීති කොකො අරඤ්ඤෙ ජාතො කොකො අරඤ්ඤකොකො, සුනඛසදිසාති ගාමසුනඛෙන සදිසා. තෙසන්ති අරඤ්ඤකොකානං. යො පනාති සුනඛො පන, උප්පන්නොති සම්බන්ධො. ගාමසුනඛියාති සාම්‍යත්ථෙ සාමිවචනං. කොකෙනාති සහාදියොගෙ කරණවචනං. තානි පදානි ‘‘සංයොගෙනා’’ති පදෙන යොජෙතබ්බානි. තස්සාති සුනඛස්ස.

එත්ථාති මනුස්සමංසාදීසු. සජාතිකතායාති සමානජාතිකභාවතො. අනුපද්දවත්ථායාති අනුපද්දවත්ථං, පටික්ඛිත්තානීති සම්බන්ධො. ආපත්තීති මනුස්සමංසෙ ථුල්ලච්චයෙන, සෙසෙ දුක්කටෙන ආපත්ති. උද්දිස්ස කතං පනාති භික්ඛුං උද්දිස්ස කතමංසං පන.