143. වත්ථුට්ඨපනාදිකථා

239. චොරා අගමංසු කිරාති සම්බන්ධො. පොක්ඛරණිතො නීහරිත්වාති සම්බන්ධො. සොති භික්ඛු, එවමාහාති සම්බන්ධො. වුත්ථෙනාති වසන්තෙන, යෙන කෙනචි කතන්ති සම්බන්ධො. තං පුග්ගලන්ති වත්ථුකතං තං පුග්ගලං. එත්ථාති ‘‘වත්ථුං ඨපෙත්වා සඞ්ඝො පවාරෙය්‍යා’’ති පාඨෙ. ඉමිනා වත්ථුනා අපදිසාහීති සම්බන්ධො. නන්ති පුග්ගලං. අනුවිජ්ජිත්වාති අනුයුඤ්ජිත්වා, පුච්ඡිත්වාති අත්ථො.

එකො භික්ඛු පූජෙසි, පිවීති සම්බන්ධො. තස්සාති භික්ඛුස්ස. තදනුරූපොති තෙසං පූජනපිවනානං අනුරූපො. සොති චොදකො භික්ඛු. තං ගන්ධන්ති තං සරීරගන්ධං. යං පුග්ගලන්ති යොජනා. ඨපෙසීති පවාරණාය ඨපෙසි. අයමස්සාති අයං දොසො අස්ස පුග්ගලස්ස.

ඉදානෙව නන්ති එත්ථ ‘‘න’’න්ති පදං ‘‘පුග්ගල’’න්ති පදෙන යොජෙතබ්බං. නං පුග්ගලන්ති හි අත්ථො. උභයන්ති වත්ථුඤ්ච පුග්ගලඤ්චාති උභයං. කල්ලං වචනායාති යුත්තං කථෙතුං. කස්මා කල්ලං වචනායාති යොජනා. පවාරණතො පුබ්බෙ, පච්ඡා චාති සම්බන්ධො. ඉති තස්මා කල්ලං වචනායාති යොජනා. ඉදඤ්හි උභයන්ති වත්ථුපුග්ගලසඞ්ඛාතං ඉදමෙව උභයං. පවාරණාය පුබ්බෙති යොජනා. උක්කොටෙන්තස්සාති චාලෙන්තස්ස.