114. සඞ්ඝභෙදෙ අනාපත්තිවස්සච්ඡෙදකථා

202. භින්නොති එත්ථ තපච්චයස්ස අතීතත්ථෙ අයුත්තභාවං දස්සෙන්තො ආහ ‘‘භින්නෙ සඞ්ඝෙ කරණීයං නත්ථී’’ති. යො පනාති සඞ්ඝො පන. ඉදං ‘‘භිජ්ජිස්සතී’’තිපදෙ කත්තා, ‘‘ආසඞ්කිතො’’තිපදෙ කම්මං. ‘‘භිජ්ජිස්සතී’’ති ඉමිනා භින්නොති එත්ථ තපච්චයස්ස අනාගතත්ථෙ පවත්තභාවං දස්සෙති. භික්ඛුනීහි සඞ්ඝො භින්නොති එත්ථ කිං භික්ඛුනීහි සඞ්ඝො භින්නොති දට්ඨබ්බොති ආහ ‘‘න භික්ඛුනීහි සඞ්ඝො භින්නොති දට්ඨබ්බො’’ති. එතන්ති භික්ඛුනීහි අභින්නභාවං. එතා පනාති භික්ඛුනියො පන. තන්ති සඞ්ඝං. එතන්ති ‘‘සම්බහුලාහි භික්ඛුනීහි සඞ්ඝො භින්නො’’ති වචනං.