275. පාලිලෙය්‍යකගමනකථා

467. පාලිලෙය්‍යකන්ති පලිලවනසණ්ඩෙ වසන්තහත්ථිනාගං. ‘‘හත්ථී’’ති ච ‘‘නාගො’’ති ච ද්වින්නං සද්දානං පරියායභාවෙන වුත්තත්තා අධිකත්ථොති ආහ ‘‘මහාහත්ථී’’ති. පුරතො පුරතො ගච්ඡන්තෙහි තෙහි හත්ථිආදීහි ඡින්නග්ගානීති යොජනා. ඔභග්ගොභග්ගන්ති භඤ්ජිත්වා අධොපාතිතං ඔභග්ගන්ති දස්සෙන්තො ආහ ‘‘භඤ්ජිත්වා භඤ්ජිත්වා පාතිත’’න්ති. ‘‘උච්චට්ඨානතො’’ති ඉමිනා අවත්‍යූපසග්ගස්ස අධොත්ථං නයෙන දස්සෙති. එතස්සාති හත්ථිනාගස්ස. තෙති හත්ථිආදයො. තෙහීති හත්ථිආදීහි. පිවන්තෙහි තෙහීති යොජනා. කද්දමොදකානීති කද්දමෙන සංසට්ඨානි උදකානි.

ඊසාදන්තස්සාති එත්ථ ඊසාය සදිසො දන්තො ඉමස්සාති ඊසාදන්තොති දස්සෙන්තො ආහ ‘‘රථඊසාසදිසදන්තස්සා’’ති. ‘‘රථඊසා’’ති ඉමිනා නඞ්ගලඊසං නිවත්තෙති. යදෙකොති යං එකො. යංසද්දො කාරණත්ථොති ආහ ‘‘යස්මා’’ති. අස්ස නාගස්සාති හත්ථිනාගස්ස. නාගෙනාති බුද්ධනාගෙන.

යථාභිරන්තන්ති එත්ථ කිත්තකං කාලං රමතීති ආහ ‘‘තෙමාස’’න්ති. එත්තාවතාති එත්තකෙන තෙමාසවිහරණෙන. පත්ථටා අහොසීති සම්බන්ධො. සබ්බත්ථාති සබ්බස්මිං ජම්බුදීපතලෙ.

‘‘කොසම්බිනිවාසිනො’’ති ඉමිනා කොසම්බියං නිවසන්තීති කොසම්බකාති වචනත්ථං දස්සෙති.