9. නවමසික්ඛාපදං
875. නවමෙ අභිසපෙය්යාති එත්ථ සපධාතුස්ස අක්කොසනත්ථං අන්තොකත්වා කරධාතුයා අත්ථං දස්සෙන්තො ආහ ‘‘සපථං කරෙය්යා’’ති. නිරයෙ නිබ්බත්තාම්හීති අහං නිරයෙ නිබ්බත්තා අම්හීති යොජනා. නිරයෙ නිබ්බත්තතූති එසා භික්ඛුනී නිරයෙ නිබ්බත්තතූති යොජනා. ඊදිසා හොතූති මම සදිසා හොතූති අත්ථො. කාණාති එකක්ඛිකාණා, ද්වක්ඛිකාණා වා. කුණීති හත්ථපාදාදිවඞ්කා.
878. එදිසාති විරූපාදිජාතිකා. විරමස්සූති විරමාහි. අද්ධාති ධුවන්ති. නවමං.