2. අන්ධකාරවග්ගො

1. පඨමසික්ඛාපද-අත්ථයොජනා

839. අන්ධකාරවග්ගස්ස පඨමෙ අප්පදීපෙති උපලක්ඛණවසෙන වුත්තත්තා අඤ්ඤෙපි ආලොකා ගහෙතබ්බාති දස්සෙන්තො ආහ ‘‘පදීපචන්දසූරියඅග්ගීසූ’’තිආදි. අස්සාති ‘‘අප්පදීපෙ’’තිපදස්ස.

841. නරහොඅස්සාදාපෙක්ඛා හුත්වා ච රස්සාදතො අඤ්ඤවිහිතාව හුත්වා චාති යොජනා. ඉමිනා ‘‘සන්තිට්ඨති වා සල්ලපති වා’’ති පදෙ කිරියාවිසෙසනභාවං දස්සෙති. දානෙන වා නිමිත්තභූතෙන, පූජාය වා නිමිත්තභූතාය මන්තෙතීති යොජනාති. පඨමං.

2. දුතියසික්ඛාපදං

842. දුතියෙ ඉදමෙව පදං නානන්ති සම්බන්ධොති. දුතියං.

3. තතියසික්ඛාපදං

846. තතියෙ ‘‘ඉදමෙවා’’ති පදං අනුවත්තෙතබ්බං. තාදිසමෙවාති පඨමසදිසමෙවාති අත්ථොති. තතියං.

4. චතුත්ථසික්ඛාපදං

850. චතුත්ථෙ කණ්ණස්ස සමීපං නිකණ්ණං, තමෙව නිකණ්ණිකන්ති වුත්තෙ කණ්ණමූලන්ති ආහ ‘‘කණ්ණමූලං වුච්චතී’’ති. ‘‘කණ්ණමූලෙ’’ති ඉමිනා ‘‘නිකණ්ණික’’න්ති එත්ථ භුම්මත්ථෙ උපයොගවචනන්ති දස්සෙති. ආහරණත්ථායාති ආහරාපනත්ථායාති. චතුත්ථං.

5. පඤ්චමසික්ඛාපදං

854. පඤ්චමෙ තෙසන්ති ඝරසාමිකානං. ඝරම්පීති න කෙවලං ආසනමෙව, ඝරම්පි සොධෙමාති අත්ථො. තතොති පරිවිතක්කනතො, පරන්ති සම්බන්ධො.

858. චොරා වා උට්ඨිතා හොන්තීති යොජනාති. පඤ්චමං.

6. ඡට්ඨසික්ඛාපදං

860. ඡට්ඨෙ අභිනිසීදෙය්‍යාති එත්ථ අභිසද්දො උපසග්ගමත්තොවාති දස්සෙන්තො ආහ ‘‘නිසීදෙය්‍යා’’ති. එසෙව නයො අභිනිපජ්ජෙය්‍යාති එත්ථාපි. ද්වෙ ආපත්තියොති සම්බන්ධොති. ඡට්ඨං.

7. සත්තමසික්ඛාපදං

864. සත්තමෙ සබ්බන්ති සකලං වත්තබ්බවචනන්ති. සත්තමං.

8. අට්ඨමසික්ඛාපදං

869. අට්ඨමෙ අනුත්තානවචනං නත්ථීති. අට්ඨමං.

9. නවමසික්ඛාපදං

875. නවමෙ අභිසපෙය්‍යාති එත්ථ සපධාතුස්ස අක්කොසනත්ථං අන්තොකත්වා කරධාතුයා අත්ථං දස්සෙන්තො ආහ ‘‘සපථං කරෙය්‍යා’’ති. නිරයෙ නිබ්බත්තාම්හීති අහං නිරයෙ නිබ්බත්තා අම්හීති යොජනා. නිරයෙ නිබ්බත්තතූති එසා භික්ඛුනී නිරයෙ නිබ්බත්තතූති යොජනා. ඊදිසා හොතූති මම සදිසා හොතූති අත්ථො. කාණාති එකක්ඛිකාණා, ද්වක්ඛිකාණා වා. කුණීති හත්ථපාදාදිවඞ්කා.

878. එදිසාති විරූපාදිජාතිකා. විරමස්සූති විරමාහි. අද්ධාති ධුවන්ති. නවමං.

10. දසමසික්ඛාපදං

879. දසමෙ අනුත්තානට්ඨානං නත්ථීති. දසමං.

අන්ධකාරවග්ගො දුතියො.