8. අට්ඨමසික්ඛාපදං

824. අට්ඨමෙ නිබ්බිට්ඨරාජභටොති එත්ථ උත්තරපදස්ස ඡට්ඨීසමාසඤ්ච පුබ්බපදෙන බාහිරත්ථසමාසඤ්ච දස්සෙන්තො ආහ ‘‘නිබ්බිට්ඨො’’තිආදි. තත්ථ ‘‘රඤ්ඤො භතී’’ති ඉමිනා රඤ්ඤො භටො රාජභටොති ඡට්ඨීසමාසං දස්සෙති, ‘‘එතෙනා’’ති ඉමිනා බාහිරත්ථසමාසං. නිබ්බිට්ඨොති නිවිට්ඨො පතිට්ඨාපිතොති අත්ථො. කෙණීති රඤ්ඤො දාතබ්බස්ස ආයස්සෙතමධිවචනං. එතෙනාති බ්‍රාහ්මණෙන. තතොති ඨානන්තරතො. භටසඞ්ඛාතාය කෙණියා පථත්තා කාරණත්තා ඨානන්තරං භටපථන්ති ආහ ‘‘තංයෙව ඨානන්තර’’න්ති.

826. චත්තාරිපි වත්ථූනීති උච්චාරාදීනි. පාටෙක්කන්ති පටිවිසුං එකෙකමෙව. උච්චාරං වාතිආදීසු වාසද්දෙන දන්තකට්ඨාදයොපි ගහෙතබ්බාති ආහ ‘‘දන්තකට්ඨ…පෙ… පාචිත්තියමෙවා’’ති. සබ්බත්ථාති සබ්බෙසු උච්චාරාදීසූති. අට්ඨමං.