4. චතුත්ථනිස්සග්ගියපාචිත්තියසික්ඛාපදං

748. චතුත්ථෙ කිණාති අනෙනාති කයන්ති වචනත්ථෙන මූලං කයං නාමාති ආහ ‘‘මූලෙනා’’ති. සාති ථුල්ලනන්දා, ආහ කිරාති සම්බන්ධො. ඤාධාතුයා අවබොධනත්ථතො අඤ්ඤම්පි ඤාධාතුයා යාචනත්ථං දස්සෙන්තො ආහ ‘‘යාචිත්වා වා’’ති.

752. යන්ති සබ්බිතෙලාදි. තඤ්ඤෙවාති සබ්බිතෙලාදිමෙව. යමකන්ති සබ්බිං සහ තෙලෙන යුගළං කත්වා. වෙජ්ජෙනාති භිසක්කෙන. සො හි ආයුබ්බෙදසඞ්ඛාතං විජ්ජං ජානාතීති වෙජ්ජොති ච රොගඤ්ච තස්ස නිදානඤ්ච භෙසජ්ජඤ්ච විදති ජානාතීතිපි වෙජ්ජොති ච වුච්චති. තතොති වෙජ්ජෙන වුත්තකාරණා. කහාපණස්සාති කහාපණෙන, ආභතන්ති සම්බන්ධොති. චතුත්ථං.