11. එකාදසමසික්ඛාපදං
1167. එකාදසමෙ තත්ථාති ‘‘පාරිවාසියඡන්දදානෙනා’’ති වචනෙ. අඤ්ඤත්‍රාති අඤ්ඤං ඨානං.
එකං අජ්ඣෙසන්තීති එකං භික්ඛුං ධම්මකථනත්ථාය නිය්‍යොජෙන්ති. අඤ්ඤං පනාති උපොසථිකතො අඤ්ඤං පන.
තත්‍රාති තෙසු භික්ඛූසු. සුභාසුභං නක්ඛත්තං පඨතීති නක්ඛත්තපාඨකො. දාරුණන්ති කක්ඛළං. තෙති භික්ඛූ. තස්සාති නක්ඛත්තපාඨකස්ස භික්ඛුස්ස. ‘‘නක්ඛත්තං පටිමානෙන්තං, අත්ථො බාලං උපච්චගා’’තිජාතකපාළි (ජා. 1.1.49). අයං පනෙත්ථ යොජනා – නක්ඛත්තං පටිමානෙන්තං බාලං අත්ථො හිතං උපච්චගා උපසමීපෙ අතික්කමිත්වා අගාති. එකාදසමං.