7. පවාරණානිද්දෙසො

පවාරණාති –

73. යෙනීරියාපථෙනායං, භුඤ්ජමානො පවාරිතො;

තතො අඤ්ඤෙන භුඤ්ජෙය්‍ය, පාචිත්තිනතිරිත්තකං.

74. අසනං භොජනඤ්චෙව, අභිහාරො සමීපතා;

කායවාචාපටික්ඛෙපො, පඤ්චඅඞ්ගා පවාරණා.

75. ඔදනො සත්තු කුම්මාසො, මච්ඡො මංසඤ්ච භොජනං;

සාලි වීහි යවො කඞ්ගු, කුද්‍රූසවරගොධුමා;

සත්තන්නමෙසං ධඤ්ඤානං, ඔදනො භොජ්ජයාගු ච.

76. සාමාකාදිතිණං කුද්‍රූසකෙ වරකචොරකො;

වරකෙ සාලියඤ්චෙව, නීවාරො සඞ්ගහං ගතො.

77. භට්ඨධඤ්ඤමයො සත්තු, කුම්මාසො යවසම්භවො;

මංසො ච කප්පියො වුත්තො, මච්ඡො උදකසම්භවො.

78. භුඤ්ජන්තො භොජනං කප්ප-මකප්පං වා නිසෙධයං;

පවාරෙය්‍යාභිහටං කප්පං, තන්නාමෙන ඉමන්ති වා.

79. ලාජා තංසත්තුභත්තානි, ගොරසො සුද්ධඛජ්ජකො;

තණ්ඩුලා භට්ඨපිට්ඨඤ්ච, පුථුකා වෙළුආදිනං.

80. භත්තං වුත්තාවසෙසානං, රසයාගු රසොපි ච;

සුද්ධයාගුඵලාදීනි, න ජනෙන්ති පවාරණං.

81. පවාරිතෙන වුට්ඨාය, අභුත්තෙන ච භොජනං;

අතිරිත්තං න කාතබ්බං, යෙන යං වා පුරෙ කතං.

82. කප්පියං ගහිතඤ්චෙවු-ච්චාරිතං හත්ථපාසගං;

අතිරිත්තං කරොන්තෙවං, ‘‘අලමෙත’’න්ති භාසතු.

83. න කරෙනුපසම්පන්න-හත්ථගං පෙසයිත්වාපි;

කාරෙතුං ලබ්භතෙ සබ්බො, භුඤ්ජිතුං තමකාරකොති.