38. කුලදූසනනිද්දෙසො

දූසනන්ති –

297. පුප්ඵං වෙළුං ඵලං චුණ්ණං, දන්තකට්ඨඤ්ච මත්තිකං;

සඞ්ගහණත්ථං දදතො, කුලදූසනදුක්කටං.

298. ථුල්ලච්චයං ගරුභණ්ඩං, ඉස්සරෙනෙත්ථ සඞ්ඝිකං;

දෙන්තස්ස දුක්කටාදීනි, ථෙය්‍යා සඞ්ඝඤ්ඤ සන්තකං.

299. කුලසඞ්ගහා රොපෙතුං, රොපාපෙතුඤ්ච සබ්බථා;

ඵලපුප්ඵූපගං රුක්ඛං, ජග්ගිතුඤ්ච න වට්ටති.

300. නිමිත්තොභාසතො කප්පවොහාරපරියායතො;

අත්තනො පරිභොගත්ථං, රොපනාදීනි ලබ්භරෙ.

301. වුත්තාව වෙජ්ජිකා ජඞ්ඝපෙසනෙ ගිහිකම්මසු;

ඨපෙත්වා පිතරො භණ්ඩුං, වෙය්‍යාවච්චකරං සකං.

302. දුක්කටං පදවාරෙන, හරණෙ දූතසාසනං;

සාසනං අග්ගහෙත්වාපි, පඨමං වදතො පුන.

303. උප්පන්නපච්චයා එවං, පඤ්චන්නම්පි අකප්පියා;

අභූතාරොචනාරූප-සංවොහාරුග්ගහාදිසා.

304. හරාපෙත්වා හරිත්වාපි, පිතූනං සෙසඤාතිනං;

පත්තානං වත්ථුපූජත්ථං, දාතුං පුප්ඵානි ලබ්භති;

මණ්ඩනත්ථඤ්ච ලිඞ්ගාදි-පූජත්ථඤ්ච න ලබ්භති.

305. තථා ඵලං ගිලානානං, සම්පත්තිස්සරියස්ස ච;

පරිබ්බයවිහීනානං, දාතුං සපරසන්තකං.

306. භාජෙන්තෙ ඵලපුප්ඵම්හි, දෙය්‍යං පත්තස්ස කස්සචි;

සම්මතෙනාපලොකෙත්වා, දාතබ්බමිතරෙන තු.

307. විහාරෙ වා පරිච්ඡිජ්ජ, කත්වාන කතිකං තතො;

දෙය්‍යං යථාපරිච්ඡෙදං, ගිලානස්සෙතරස්ස වා;

යාචමානස්ස කතිකං, වත්වා රුක්ඛාව දස්සියා.

308. සිරීසකසවාදීනං, චුණ්ණෙ සෙසෙ ච නිච්ඡයො;

යථාවුත්තනයො එව, පණ්ණම්පෙත්ථ පවෙසයෙති.