25. අකප්පියසයනනිද්දෙසො

අකප්පියසයනානීති –

187. ආසන්දී තූලී පල්ලඞ්කො, පටිකං ගොනචිත්තකං;

පටලී විකතී උද්ද-ලොමී එකන්තලොමිකා.

188. කුත්තං කොසෙය්‍යං කට්ටිස්සං, හත්ථිඅස්සරථත්ථරා;

ජිනප්පවෙණිකදලී-මිගප්පවරඅත්ථරා.

189. සලොහිතවිතානඤ්චු-භතොරත්තූපධානකං;

අකප්පියානි එතානි, දුක්කටං පරිභුඤ්ජතො.

190. ආසන්දාදිත්තයා සෙසෙ, ලබ්භතෙ ගිහිසන්තකෙ;

ධම්මාසනෙ ච භත්තග්ගෙ, ඝරෙ චාපි නිසීදිතුං;

භූමත්ථරණසඞ්ඛෙපෙ, සයිතුඤ්චාපි කප්පති.

191. චතුරංසපීඨා සත්තඞ්ගා, පඤ්චඞ්ගා උච්චපාදකා;

තූලොනද්ධා ඝරෙයෙව, මඤ්චපීඨා නිසීදිතුං.

192. චොළවාකුණ්ණපණ්ණානං, තිණානඤ්චෙව පූරිතා;

චීවරච්ඡවියො පඤ්ච, භිසී සබ්බත්ථ කප්පියා.

193. තූලත්තයං භිසිගබ්භො, ලොමානි මිගපක්ඛිනං;

බිම්බොහනෙ අනුඤ්ඤාතං, තූලවජ්ජා මසූරකෙ.

194. මනුස්සලොමමුණ්ණායං, පණ්ණෙ පුප්ඵං තමාලකං;

සුද්ධං න ආසනඤ්චෙව, ලබ්භමප්පටිවෙක්ඛිතන්ති.