11. නිස්සග්ගියනිද්දෙසො
නිස්සග්ගියානීති –
116. අරූපියං රූපියෙන, රූපියං ඉතරෙන ච;
රූපියං පරිවත්තෙය්‍ය, නිස්සග්ගි ඉධ රූපියං.
117. කහාපණො සජ්ඣු සිඞ්ගී, වොහාරූපගමාසකං;
වත්ථමුත්තාදි ඉතරං, කප්පං දුක්කටවත්ථු ච.
118. ‘‘ඉමං ගහෙත්වා භුත්වා වා, ඉමං දෙහි කරානය;
දෙමි වා’’ති සමාපන්නෙ, නිස්සග්ගි කයවික්කයෙ.
119. අත්තනො අඤ්ඤතො ලාභං, සඞ්ඝස්සඤ්ඤස්ස වා නතං;
පරිණාමෙය්‍ය නිස්සග්ගි, පාචිත්ති චාපි දුක්කටං.
120. අනිස්සජ්ජිත්වා නිස්සග්ගිං, පරිභුඤ්ජෙ න දෙය්‍ය වා;
නිස්සට්ඨං සකසඤ්ඤාය, දුක්කටං අඤ්ඤථෙතරන්ති.