10. අනනුඤ්ඤාතසික්ඛාපදවණ්ණනා

තෙසං අත්ථිභාවං අජානන්තියාති (පාචි. අට්ඨ. 1163) තෙසං මාතාදීනං අත්ථිභාවං අජානන්තියා. අනනුඤ්ඤාතසමුට්ඨානන්ති යං වාචතො, කායවාචතො, වාචාචිත්තතො, කායවාචාචිත්තතො ච සමුට්ඨාති, තං අනනුඤ්ඤාතසමුට්ඨානං. කථං? අබ්භානකම්මාදීසු කෙනචිදෙව කරණීයෙන ඛණ්ඩසීමායං නිසින්නා ‘‘පක්කොසථ සික්ඛමානං, ඉධෙව නං උපසම්පාදෙස්සාමා’’ති උපසම්පාදෙති, එවං වාචතො සමුට්ඨාති. ‘‘උපස්සයතො උට්ඨාය උපසම්පාදෙස්සාමී’’ති වත්වා ඛණ්ඩසීමං ගච්ඡන්තියා කායවාචතො සමුට්ඨාති. ද්වීසු ඨානෙසු පණ්ණත්තිං ජානිත්වා වීතික්කමං කරොන්තියා වාචාචිත්තතො, කායවාචාචිත්තතො ච සමුට්ඨාති. අනනුජානාපෙත්වා උපසම්පාදනතො කිරියාකිරියං.

අනනුඤ්ඤාතසික්ඛාපදවණ්ණනා නිට්ඨිතා.