8. කුමාරිභූතවග්ගො

1-5. පඨමකුමාරිභූතාදිසික්ඛාපදවණ්ණනා

සබ්බපඨමා ද්වෙ මහාසික්ඛමානාති ගබ්භිනිවග්ගෙ වුත්තා ද්වෙ සික්ඛමානා. ‘‘සික්ඛමානා’’ඉච්චෙව වත්තබ්බාති සම්මුතිකම්මාදීසු එවං වත්තබ්බා. ‘‘ගිහිගතා’’ති වා ‘‘කුමාරිභූතා’’ති වා න වත්තබ්බාති සචෙ වදන්ති, කම්මං කුප්පතීති අධිප්පායො.

චතුත්ථපඤ්චමානි උත්තානත්ථානෙව.

පඨමකුමාරිභූතාදිසික්ඛාපදවණ්ණනා නිට්ඨිතා.

6-8. ඛීයනධම්මාදිසික්ඛාපදවණ්ණනා

වුට්ඨාපනසම්මුතියා යාචිතායාති උපසම්පදාසම්මුතියා යාචිතාය.

සත්තමට්ඨමානි උත්තානත්ථානෙව.

ඛීයනධම්මාදිසික්ඛාපදවණ්ණනා නිට්ඨිතා.

9. සොකාවාසසික්ඛාපදවණ්ණනා

ආගච්ඡමානාති ආගච්ඡන්තී.

සොකාවාසසික්ඛාපදවණ්ණනා නිට්ඨිතා.

10. අනනුඤ්ඤාතසික්ඛාපදවණ්ණනා

තෙසං අත්ථිභාවං අජානන්තියාති (පාචි. අට්ඨ. 1163) තෙසං මාතාදීනං අත්ථිභාවං අජානන්තියා. අනනුඤ්ඤාතසමුට්ඨානන්ති යං වාචතො, කායවාචතො, වාචාචිත්තතො, කායවාචාචිත්තතො ච සමුට්ඨාති, තං අනනුඤ්ඤාතසමුට්ඨානං. කථං? අබ්භානකම්මාදීසු කෙනචිදෙව කරණීයෙන ඛණ්ඩසීමායං නිසින්නා ‘‘පක්කොසථ සික්ඛමානං, ඉධෙව නං උපසම්පාදෙස්සාමා’’ති උපසම්පාදෙති, එවං වාචතො සමුට්ඨාති. ‘‘උපස්සයතො උට්ඨාය උපසම්පාදෙස්සාමී’’ති වත්වා ඛණ්ඩසීමං ගච්ඡන්තියා කායවාචතො සමුට්ඨාති. ද්වීසු ඨානෙසු පණ්ණත්තිං ජානිත්වා වීතික්කමං කරොන්තියා වාචාචිත්තතො, කායවාචාචිත්තතො ච සමුට්ඨාති. අනනුජානාපෙත්වා උපසම්පාදනතො කිරියාකිරියං.

අනනුඤ්ඤාතසික්ඛාපදවණ්ණනා නිට්ඨිතා.

11. පාරිවාසිකසික්ඛාපදවණ්ණනා

දාරුණන්ති පාපං. පතිමානෙන්තන්ති ඔලොකෙන්තං.

පාරිවාසිකසික්ඛාපදවණ්ණනා නිට්ඨිතා.

12. අනුවස්සසික්ඛාපදවණ්ණනා

එකන්තරිකන්ති එකෙන වස්සෙන අන්තරිකං කත්වා.

අනුවස්සසික්ඛාපදවණ්ණනා නිට්ඨිතා.

13. එකවස්සසික්ඛාපදවණ්ණනා

මාතිකායං එකං වස්සං ද්වෙති එකන්තරිකෙ එකෙකස්මිං සංවච්ඡරෙ ද්වෙ. එකන්තරිකං වුට්ඨාපෙන්තියාති ඉමස්මිං වස්සෙ එකං, පුන එකන්තරිකං එකන්ති ද්වෙ වුට්ඨාපෙන්තියා අනාපත්ති.

එකවස්සසික්ඛාපදවණ්ණනා නිට්ඨිතා.

කුමාරිභූතවග්ගො අට්ඨමො.