4. තුවට්ටවග්ගො

1-3. එකමඤ්චතුවට්ටනාදිසික්ඛාපදවණ්ණනා

පඨමං උත්තානත්ථමෙව.

වවත්ථානං දස්සෙත්වාති (පාචි. අට්ඨ. 940) මජ්ඣෙ කාසායං වා කත්තරයට්ඨිං වා අන්තමසො කායබන්ධනම්පි ඨපෙත්වා නිපජ්ජන්තීනං අනාපත්තීති අත්ථො.

තතියං උත්තානත්ථමෙව.

එකමඤ්චතුවට්ටනාදිසික්ඛාපදවණ්ණනා නිට්ඨිතා.

4-9. නඋපට්ඨාපනාදිසික්ඛාපදවණ්ණනා

පරියෙසිත්වා අලභන්තියාති අඤ්ඤං උපට්ඨායිකං අලභන්තියා. ගිලානායාති සයං ගිලානාය. ආපදාසූති තථාරූපෙ උපද්දවෙ සති.

පඤ්චමඡට්ඨසත්තම අට්ඨමනවමානි උත්තානත්ථානෙව.

නඋපට්ඨාපනාදිසික්ඛාපදවණ්ණනා නිට්ඨිතා.

10. චාරිකනපක්කමනසික්ඛාපදවණ්ණනා

ධුරෙ නික්ඛිත්තමත්තෙති සචෙ ධුරං නික්ඛිපිත්වා පච්ඡා පක්කමති, ආපත්තියෙවාති අත්ථො. අන්තරායෙ සතීති දසවිධෙසු අන්තරායෙසු අඤ්ඤතරස්මිං සති. ‘‘ගච්ඡිස්සාමී’’ති නික්ඛන්තා, නදී වා පූරා, වනදාහො වා ආගතො, චොරා වා මග්ගෙ හොන්ති, මෙඝො වා උට්ඨහති, නිවත්තිතුං වට්ටති.

චාරිකනපක්කමනසික්ඛාපදවණ්ණනා නිට්ඨිතා.

තුවට්ටවග්ගො චතුත්ථො.