3. නග්ගවග්ගො

1-2. නග්ගාදිසික්ඛාපදවණ්ණනා

ඉදන්ති ඉදං උදකසාටිකචීවරං.

දුතියං උත්තානත්ථමෙව.

නග්ගාදිසික්ඛාපදවණ්ණනා නිට්ඨිතා.

3. චීවරසිබ්බනසික්ඛාපදවණ්ණනා

විසිබ්බෙත්වාති විජටෙත්වා. ධුරං නික්ඛිත්තමත්තෙති ධුරෙ නික්ඛිත්තමත්තෙ, ධුරං නික්ඛිපිත්වා සචෙපි පච්ඡා සිබ්බති, ආපත්තියෙවාති අත්ථො.

චීවරසිබ්බනසික්ඛාපදවණ්ණනා නිට්ඨිතා.

4. සඞ්ඝාටිචාරසික්ඛාපදවණ්ණනා

‘‘ඉදං මෙ චීවරං මහග්ඝං ඊදිසෙ චොරභයෙ න සක්කා ධාරෙතුන්ති එවරූපාසු ආපදාසූ’’ති එත්ථ පාඨො. සො පන කාකපදසඤ්ජනිතමොහෙහි ලෙඛකෙහි උපරිසික්ඛාපදෙ ලිඛිතො. කිඤ්චාපි තත්ථ ලිඛිතො, එත්ථෙව පන දට්ඨබ්බො.

සඞ්ඝාටිචාරසික්ඛාපදවණ්ණනා නිට්ඨිතා.

5. චීවරසඞ්කමනීයසික්ඛාපදවණ්ණනා

ආපදාසු වා ධාරෙතීති සචෙ අපාරුතං වා අනිවත්ථං වා චොරා හරන්ති, එවරූපාසූ ආපදාසු ධාරෙති, අනාපත්ති.

චීවරසඞ්කමනීයසික්ඛාපදවණ්ණනා නිට්ඨිතා.

6. ගණචීවරසික්ඛාපදවණ්ණනා

අඤ්ඤස්මිං පරික්ඛාරෙති යත්ථ කත්ථචි ථාලකාදීනං වා සප්පිතෙලාදීනං වා අඤ්ඤතරස්මිං. ‘‘සමග්ඝකාලෙ දස්සථා’’ති එවං ආනිසංසං දස්සෙත්වා නිවාරෙන්තියාති ‘‘කිත්තකං අග්ඝනකං දාතුකාමත්ථා’’ති පුච්ඡිත්වා (පාචි. අට්ඨ. 909) ‘‘එත්තකං නාමා’’ති වුත්තෙ ‘‘ආගමෙථ තාව, ඉදානි වත්ථං මහග්ඝං, කතිපාහෙන කප්පාසෙ ආහටෙ සමග්ඝං භවිස්සති, තස්මිං කාලෙ දස්සථා’’ති එවං ආනිසංසං දස්සෙත්වා නිවාරෙන්තියා.

ගණචීවරසික්ඛාපදවණ්ණනා නිට්ඨිතා.

7-10. පටිබාහනාදිසික්ඛාපදවණ්ණනා

ආනිසංසං දස්සෙත්වා පටිබාහන්තියාති ‘‘එකිස්සා එකං සාටකං නප්පහොති, ආගමෙථ තාව, කතිපාහෙන උප්පජ්ජිස්සති, තතො භාජෙස්සාමා’’ති (පාචි. අට්ඨ. 915) එවං ආනිසංසං දස්සෙත්වා පටිබාහන්තියා අනාපත්ති.

අට්ඨමනවමානි උත්තානත්ථානෙව.

සෙසන්ති ‘‘ධම්මිකෙ වෙමතිකායා’’තිආදිකං අවසෙසං. තත්ථ ආනිසංසං දස්සෙත්වා පටිබාහන්තියාති ‘‘භික්ඛුනිසඞ්ඝො ජිණ්ණචීවරො, කථිනානිසංසමූලකො මහාලාභො’’ති (පාචි. අට්ඨ. 931) එවරූපං ආනිසංසං දස්සෙත්වා පටිබාහන්තියා අනාපත්ති.

පටිබාහනාදිසික්ඛාපදවණ්ණනා නිට්ඨිතා.

නග්ගවග්ගො තතියො.