5. අනාපුච්ඡාපක්කමනසික්ඛාපදවණ්ණනා

ආසීදන්ති එත්ථාති ආසනන්ති ආහ ‘‘පල්ලඞ්කස්සොකාසභූතෙ’’ති, ඌරුබද්ධාසනස්ස ඔකාසෙති අත්ථො. අනොවස්සකන්ති නිබ්බකොකාසං. අජ්ඣොකාසෙ උපචාරන්ති අජ්ඣොකාසෙ නිසීදිත්වා ද්වාදසහත්ථප්පමාණං පදෙසං. ගිලානායාති යා තාදිසෙන ගෙලඤ්ඤෙන ආපුච්ඡිතුං න සක්කොති. ආපදාසූති ඝරෙ අග්ගි වා උට්ඨිතො හොති, චොරො වා, එවරූපෙ උපද්දවෙ අනාපුච්ඡා පක්කමති, අනාපත්ති.

අනාපුච්ඡාපක්කමනසික්ඛාපදවණ්ණනා නිට්ඨිතා.