2. රත්තන්ධකාරවග්ගො

1. රත්තන්ධකාරසික්ඛාපදවණ්ණනා

අරහොපෙක්ඛායාති නරහොඅස්සාදාපෙක්ඛාය. අඤ්ඤවිහිතායාති රහොඅස්සාදතො අඤ්ඤවිහිතාව හුත්වා ඤාතිං වා පුච්ඡන්තියා, දානෙ වා පූජාය වා මන්තෙන්තියා.

රත්තන්ධකාරසික්ඛාපදවණ්ණනා නිට්ඨිතා.

2-3. පටිච්ඡන්නොකාසඅජ්ඣොකාසසල්ලපනසික්ඛාපදවණ්ණනා

දුතියතතියානි උත්තානත්ථානෙව.

පටිච්ඡන්නොකාසඅජ්ඣොකාසසල්ලපනසික්ඛාපදවණ්ණනා නිට්ඨිතා.

4. දුතියිකඋය්‍යොජනසික්ඛාපදවණ්ණනා

‘‘පුරිමනයෙනෙවා’’ති ඉමිනා ‘‘සන්තිට්ඨෙය්‍ය වාති හත්ථපාසෙ ඨිතමත්තාය පාචිත්තියං, සල්ලපෙය්‍ය වාති තත්ථ ඨත්වා ගෙහසිකකථං කථෙන්තියාපි පාචිත්තියමෙව, නිකණ්ණිකං වා ජප්පෙය්‍යාති කණ්ණමූලෙ ජප්පෙන්තියාපි පාචිත්තියමෙවා’’ති ඉමං නයං දස්සෙති.

දුතියිකඋය්‍යොජනසික්ඛාපදවණ්ණනා නිට්ඨිතා.

5. අනාපුච්ඡාපක්කමනසික්ඛාපදවණ්ණනා

ආසීදන්ති එත්ථාති ආසනන්ති ආහ ‘‘පල්ලඞ්කස්සොකාසභූතෙ’’ති, ඌරුබද්ධාසනස්ස ඔකාසෙති අත්ථො. අනොවස්සකන්ති නිබ්බකොකාසං. අජ්ඣොකාසෙ උපචාරන්ති අජ්ඣොකාසෙ නිසීදිත්වා ද්වාදසහත්ථප්පමාණං පදෙසං. ගිලානායාති යා තාදිසෙන ගෙලඤ්ඤෙන ආපුච්ඡිතුං න සක්කොති. ආපදාසූති ඝරෙ අග්ගි වා උට්ඨිතො හොති, චොරො වා, එවරූපෙ උපද්දවෙ අනාපුච්ඡා පක්කමති, අනාපත්ති.

අනාපුච්ඡාපක්කමනසික්ඛාපදවණ්ණනා නිට්ඨිතා.

6. අනාපුච්ඡාඅභිනිසීදනසික්ඛාපදවණ්ණනා

ධුවපඤ්ඤත්තෙති භික්ඛුනීනං අත්ථාය නිච්චපඤ්ඤත්තෙ.

අනාපුච්ඡාඅභිනිසීදනසික්ඛාපදවණ්ණනා නිට්ඨිතා.

7. අනාපුච්ඡාසන්ථරණසික්ඛාපදවණ්ණනා

කුලානීති කුලස්ස ඝරානි.

අනාපුච්ඡාසන්ථරණසික්ඛාපදවණ්ණනා නිට්ඨිතා.

8. පරඋජ්ඣාපනකසික්ඛාපදවණ්ණනා

අට්ඨමං උත්තානත්ථමෙව.

පරඋජ්ඣාපනකසික්ඛාපදවණ්ණනා නිට්ඨිතා.

9. පරඅභිසපනසික්ඛාපදවණ්ණනා

මනුස්සදොභග්ගෙන වාති ‘‘කාණා හොමි, කුණී හොමි, ඉතරා වා ඊදිසා හොතූ’’තිආදිනා මනුස්සවිරූපභාවෙන. අත්ථධම්මඅනුසාසනිපුරෙක්ඛාරානන්ති එත්ථ අත්ථපුරෙක්ඛාරායාති අට්ඨකථං කථෙන්තියා. ධම්මපුරෙක්ඛාරායාති පාළිං වාචෙන්තියා. අනුසාසනිපුරෙක්ඛාරායාති ‘‘ඉදානිපි ත්වං එදිසා, සාධු විරමස්සු, නො චෙ විරමසි, අද්ධා පුන එවරූපානි කම්මානි කත්වා නිරයෙ උප්පජ්ජිස්සසි, තිරච්ඡානයොනියා උප්පජ්ජිස්සසී’’ති (පාචි. අට්ඨ. 878) එවං අනුසාසනියං ඨත්වා වදන්තියා.

පරඅභිසපනසික්ඛාපදවණ්ණනා නිට්ඨිතා.

10. රොදනසික්ඛාපදවණ්ණනා

දසමං උත්තානත්ථමෙව.

රොදනසික්ඛාපදවණ්ණනා නිට්ඨිතා.

රත්තන්ධකාරවග්ගො දුතියො.