6. ඡක්කනිද්දෙසවණ්ණනා

805. විසුද්ධිභාවන්ති විසුද්ධියා සබ්භාවං. ‘‘දිබ්බචක්ඛුඤාණෙකදෙසත්තා’’ති ඉදං තස්ස පරිභණ්ඩඤාණත්තා වුත්තං. තථා හි පාළියං ‘‘සත්තානං චුතූපපාතඤාණාය චිත්තං අභිනීහරති අභිනින්නාමෙතී’’ති (දී. නි. 1.247) ආරභිත්වා ‘‘සො දිබ්බෙන චක්ඛුනා විසුද්ධෙනා’’තිආදි (දී. නි. 1.246) වුත්තං. දිබ්බස්ස තිරොහිතවිප්පකට්ඨාදිභෙදස්ස, ඉතරස්ස ච රූපායතනස්ස දස්සනසමත්ථස්සාපි දිබ්බචක්ඛුඤාණස්ස සිඛාපත්ති චවමානොපපජ්ජමානසත්තදස්සනන්ති ආහ ‘‘මුද්ධප්පත්තෙන චා’’තිආදි.

ඡක්කනිද්දෙසවණ්ණනා නිට්ඨිතා.