9. පධානසුත්තවණ්ණනා

69. නවමෙ පදහති එතෙහීති පධානානි. උත්තමවීරියානි සෙට්ඨවීරියානි විසිට්ඨස්ස අත්ථස්ස සාධනතො. කිලෙසානං සංවරත්ථායාති යථා අභිජ්ඣාදයො න උප්පජ්ජන්ති, එවං සතියා උපට්ඨානෙන කිලෙසානං සංවරණත්ථාය. පජහනත්ථායාති කාමවිතක්කාදීනං විනොදනත්ථාය. පධානන්ති තස්සෙව පජහනස්ස සාධනවසෙන පවත්තවීරියං. කුසලානං ධම්මානං බ්‍රූහනත්ථායාති බොජ්ඣඞ්ගසඞ්ඛාතානං කුසලධම්මානං වඩ්ඪනත්ථාය. පධානන්ති තස්සෙව වඩ්ඪනස්ස සාධනවසෙන පවත්තවීරියං.

පධානසුත්තවණ්ණනා නිට්ඨිතා.