1-3. අභිඤ්ඤාසුත්තාදිවණ්ණනා

254-256. ඡට්ඨස්ස පඨමෙ පච්චනීකසමනතො සමථො, සමාධීති ආහ ‘‘චිත්තෙකග්ගතා’’ති. අනිච්චාදිනා විවිධෙනාකාරෙන දස්සනතො විපස්සනා, සඞ්ඛාරපරිග්ගාහකඤාණං. තෙනාහ ‘‘සඞ්ඛාරපරිග්ගහවිපස්සනාඤාණ’’න්ති.

දුතියෙ අනරියෙහි පරියෙසිතබ්බත්තා අනරියානං පරියෙසනාති අනරියපරියෙසනා. සයං ලාමකතාය අනරියානං පරියෙසනාති වා අනරියපරියෙසනා. ජරාසභාවන්ති ජීරණපකතිකං. තතියං උත්තානමෙව.

අභිඤ්ඤාසුත්තාදිවණ්ණනා නිට්ඨිතා.