5. අනුසොතසුත්තවණ්ණනා
5. පඤ්චමෙ අනුසොතං ගච්ඡතීති සංසාරසොතස්ස අනුකූලභාවෙන ගච්ඡති. පච්චනීකපටිපත්තියාති සංසාරසොතස්ස පටිකූලවසෙන පවත්තනිබ්බිදානුපස්සනාදිපටිපත්තියා. ඨිතසභාවොති අචලප්පසාදාදිසමන්නාගමෙන ඨිතසභාවො. අනාගාමී හි අස්සද්ධියෙහි කාමරාගබ්‍යාපාදෙහි අකම්පනියචිත්තතාය තම්හා ලොකා අනාවත්තිධම්මතාය ච ඨිතසභාවො නාම. ඔඝං තරිත්වාති කාමොඝාදිචතුබ්බිධං ඔඝං අතික්කමිත්වා. පරතීරං ගතොති නිබ්බානපාරං ගතො. බ්‍රාහ්මණොති බාහිතපාපතාය බ්‍රාහ්මණොති සඞ්ඛං ගතො ඛීණාසවො. තෙනාහ ‘‘සෙට්ඨො නිද්දොසො’’ති. පඤ්චවෙරකම්මන්ති පාණාතිපාතාදිපඤ්චදුච්චරිතං. සහාපි දුක්ඛෙන සහාපි දොමනස්සෙනාති කිලෙසපරියුට්ඨානෙ සති උප්පන්නෙන දුක්ඛදොමනස්සෙන සද්ධිම්පි. පරිපුණ්ණන්ති තිස්සන්නං සික්ඛානං එකායපි අනූනං. පරිසුද්ධන්ති නිරුපක්කිලෙසං. බ්‍රහ්මචරියන්ති සෙට්ඨචරියං. ඉමිනා වාරෙන සොතාපන්නසකදාගාමිනො කථිතා. කිං පන තෙ රුදන්තා බ්‍රහ්මචරියං චරන්තීති? ආම, කිලෙසරොදනෙන රොදන්තා චරන්ති නාම, සීලසම්පන්නො පුථුජ්ජනභික්ඛු එත්ථෙව සඞ්ගහිතො.
චෙතොවිමුත්තින්ති ඵලසමාධිං. පඤ්ඤාවිමුත්තින්ති ඵලඤාණං. ඡහාකාරෙහි පාරගතොති අභිඤ්ඤාපාරගූ, පරිඤ්ඤාපාරගූ, භාවනාපාරගූ, පහානපාරගූ, සච්ඡිකිරියාපාරගූ, සමාපත්තිපාරගූති එවං ඡහි ආකාරෙහි සබ්බධම්මානං පාරං පරියොසානං ගතො. සෙසමෙත්ථ සුවිඤ්ඤෙය්‍යමෙව.
අනුසොතසුත්තවණ්ණනා නිට්ඨිතා.