7-10. ඛිප්පනිසන්තිසුත්තාදිවණ්ණනා
97-100. සත්තමෙ ඛිප්පනිසන්තීති ඛිප්පපඤ්ඤො. තෙනාහ ‘‘ඛිප්පනිසාමනො’’තිආදි. අනුරූපධම්මන්ති ලොකුත්තරාධිගමස්ස අනුච්ඡවිකසභාවං. කල්‍යාණා සුන්දරා පරිමණ්ඩලපදබ්‍යඤ්ජනා වාචා අස්සාති කල්‍යාණවාචො. තෙනාහ ‘‘සුන්දරවචනො’’ති. කල්‍යාණං මධුරං වාක්කරණං උදාහාරඝොසො අස්සාති කල්‍යාණවාක්කරණො. ගුණපරිපුණ්ණභාවෙන පූරෙ පුණ්ණභාවෙ භවාති පොරී, තාය පොරියා. තෙනාහ ‘‘ගුණපරිපුණ්ණායා’’ති. පුරෙ භවත්තා පොරියා නාගරිකිත්ථියා සුඛුමාලත්තනෙන සදිසාති පොරී, තාය පොරියා. ‘‘සුඛුමාලත්තනෙනා’’ති ඉමිනා තස්සා වාචාය මුදුසණ්හභාවො වුත්තො. අපලිබුද්ධායාති පිත්තසෙම්හාදීහි න පලිවෙඨිතාය. අදොසායාති සන්දිද්ධවිලම්බිතාදිදොසරහිතාය අගළිතපදබ්‍යඤ්ජනායාති අපතිතපදබ්‍යඤ්ජනාය අවිරහිතපදබ්‍යඤ්ජනාය. උභයමෙතං අනෙලගලායාති ඉමස්සෙව අත්ථවචනං. අනෙලගලායාති හි අනෙලාය චෙව අගලාය චාති අත්ථො. අත්ථං විඤ්ඤාපෙතුං සමත්ථායාති ආදිමජ්ඣපරියොසානං පාකටං කත්වා භාසිතත්ථස්ස විඤ්ඤාපනසත්ථාය. අට්ඨමනවමදසමානි උත්තානත්ථානෙව.
ඛිප්පනිසන්තිසුත්තාදිවණ්ණනා නිට්ඨිතා.
අසුරවග්ගවණ්ණනා නිට්ඨිතා.
දුතියපණ්ණාසකං නිට්ඨිතං.