1. පඨමද්වෙබ්‍රාහ්මණසුත්තවණ්ණනා
52. බ්‍රාහ්මණවග්ගස්ස පඨමෙ ජරාජිණ්ණාති ජරාවසෙන ජිණ්ණා, න බ්‍යාධිආදීනං වසෙන ජිණ්ණසදිසත්තා ජිණ්ණා. වයොවුද්ධාති වයසො වුද්ධිප්පත්තියා වුද්ධා, න සීලාදිවුද්ධියා. ජාතිමහල්ලකාති ජාතියා මහන්තතාය චිරරත්තඤ්ඤුතාය ජාතිමහල්ලකා. තයො අද්ධෙ අතික්කන්තාති පඨමො, මජ්ඣිමො, පච්ඡිමොති තයො අද්ධෙ අතීතා. තතියං වයං අනුප්පත්තාති තතො එව පච්ඡිමං වයං අනුප්පත්තා. අකතභයපරිත්තාණාති එත්ථ භයපරිත්තාණන්ති දුග්ගතිභයතො පරිත්තායකං පුඤ්ඤං, තං අකතං එතෙහීති අකතභයපරිත්තාණා. පතිට්ඨාකම්මන්ති සුගතිසඞ්ඛාතප්පතිට්ඨාවහං කම්මං. උපසංහරීයතීති සම්පාපීයති. ‘‘උපනීයතී’’ති වුත්තං, කිං කෙන උපනීයතීති ආහ ‘‘අයඤ්හි ජාතියා ජරං උපනීයතී’’තිආදි. අයන්ති ලොකො. ජාතො න ජාතභාවෙනෙව තිට්ඨති, අථ ඛො තතො පරං ජරං පාපීයති, ජරාය බ්‍යාධිං පාපීයති. එවං පරතො පරං දුක්ඛමෙව උපනීයති.
තායනට්ඨෙනාති රක්ඛනට්ඨෙන. නිලීයනට්ඨෙනාති නිලීනට්ඨානභාවෙන. පතිට්ඨානට්ඨෙනාති පතිට්ඨානභාවෙන. අවස්සයනට්ඨෙනාති අවස්සයිතබ්බභාවෙන. උත්තමගතිවසෙනාති පරමගතිභාවෙන.
පඨමද්වෙබ්‍රාහ්මණසුත්තවණ්ණනා නිට්ඨිතා.