2. පවිවෙකසුත්තවණ්ණනා

94. දුතියෙ සාණෙහි වාකෙහි නිබ්බත්තිතානි සාණානි. මිස්සසාණානි මසාණානි න භඞ්ගානි. එරකතිණාදීනීති ආදි-සද්දෙන අක්කමකචිකදලිවාකාදීනං සඞ්ගහො. එරකාදීහි කතානි හි ඡවානි ලාමකානි දුස්සානීති ‘‘ඡවදුස්සානී’’ති වත්තබ්බතං ලභන්ති. කුණ්ඩකන්ති තනුතරං තණ්ඩුලප්පකරණං. පඤ්ච දුස්සීල්‍යානීති පාණාතිපාතාදීනි පඤ්ච. චත්තාරො ආසවාති කාමාසවාදයො චත්තාරො ආසවා. සීලග්ගප්පත්තොති සීලෙන, සීලස්ස වා අග්ගප්පත්තො.

පවිවෙකසුත්තවණ්ණනා නිට්ඨිතා.