ඡබ්බිසතිමො පරිච්ඡෙදො

26. වුට්ඨානවිසුද්ධිකථා

1019. තස්සෙවං පටිපන්නස්ස, සිඛාපත්තා විපස්සනා;

වුට්ඨානගාමිනී නාම, යදා හොති තදා පන.

1020. පරිකම්මොපචාරානුලොමගොත්‍රභුතො පරං;

මග්ගො තතො ඵලං හොති, භවඞ්ගා පච්චවෙක්ඛණා.

1021. පරිකම්මොපචාරානුලොමසඞ්ඛාතගොචරා;

මග්ගස්සාවජ්ජනං හුත්වා, නිබ්බානෙ හොති ගොත්‍රභු.

1022. චතුත්ථං පඤ්චමං වාථ, ඡට්ඨං වාපි යථාරහං;

අප්පෙති මග්ගජවනං, නිබ්බානෙ සකිමෙව තං.

1023. තතො ඵලානි තීණි ද්වෙ, එකං වාථ යථාක්කමං;

මග්ගාවසෙසනිරොධමග්ගවුට්ඨානවීථියං.

1024. තතො භවඞ්ගපාතොව,

තං ඡෙත්වා පච්චවෙක්ඛණා;

තිස්සො පඤ්චවිධා හොන්ති,

යථායොගං තථා හි ච.

1025. මග්ගං ඵලඤ්ච නිබ්බානං, අවස්සං පච්චවෙක්ඛති;

හීනෙ කිලෙසෙ සෙසෙ ච, පච්චවෙක්ඛති වා න වා.

1026. තතො ච පුන සඞ්ඛාරෙ, විපස්සන්තො යථා පුරෙ;

අප්පෙති අනුපුබ්බෙන, සෙසමග්ගඵලානි ච.

1027. තත්ථ වුච්චන්ති නිබ්බාන-ඵලමග්ගවිපස්සනා;

සුඤ්ඤතා චානිමිත්තා ච, තථාපණිහිතානි ච.

1028. සුඤ්ඤතාවිපස්සනාදිනාමෙන හි විපස්සති;

විමොක්ඛමුඛභූතාති, තිවිධා භාජිතා තථා.

1029. සුඤ්ඤතාදිකනාමෙන, විමොක්ඛා තිවිධා මතා;

නිබ්බානඵලමග්ගා ච, සමාපත්තිසමාධයො.

1030. තත්ථෙව පඨමභූමිං, පත්තො අරියපුග්ගලො;

සත්තක්ඛත්තුපරමො සො, සොතාපන්නොති වුච්චති.

1031. පත්තො දුතියභූමිඤ්ච, සකදාගාමිනාමකො;

සකිමෙව ඉමං ලොකං, ආගන්ත්වා හොති මානුසං.

1032. පත්තො තතියභූමිඤ්ච, අනාගාමීති වුච්චති;

බ්‍රහ්මලොකා අනාගන්ත්වා, ඉධකාමොපපත්තියා.

1033. පත්තො චතුත්ථභූමිඤ්ච, අරහා අග්ගපුග්ගලො;

දිට්ඨෙව ධම්මෙ දුක්ඛග්ගිං, නිබ්බාපෙතීති වුච්චති.

1034. ඉති මග්ගඵලට්ඨානං, වසා අරියපුග්ගලා;

ද්විධාපි චතුධා යුග්ගා, අට්ඨ හොන්ති විභාගතො.

1035. උභතොභාගවිමුත්ත-

විභාගාදිවසා පන;

විභත්තා හොන්ති සත්තෙතෙ,

යථායොගං තථා හි ච.

1036. සද්ධාධුරස්සානිච්චතො, වුට්ඨානං දුක්ඛතොපි ච;

පඤ්ඤාධුරස්සානත්තතො, ඉති දීපෙන්ති පණ්ඩිතා.

1037. සද්ධානුසාරි ආදිම්හි, මජ්ඣෙ සද්ධාවිමුත්තකො;

අන්තෙ පඤ්ඤාවිමුත්තොව, තස්මා සද්ධාධුරො සියා.

1038. ධම්මානුසාරි ආදිම්හි, දිට්ඨිප්පත්තො තතොපරි;

අන්තෙ පඤ්ඤාවිමුත්තොව, හොති පඤ්ඤාධුරොපි ච.

1039. සමථයානිකා චෙව, රූපානුත්තරපාදකා;

විපස්සනායානිකා ච, සබ්බෙ සුක්ඛවිපස්සකා.

1040. ධුරවුට්ඨානභෙදෙන, හොන්ති පඤ්චෙව සබ්බථා;

ආරුප්පපාදකා චාපි, ආදිම්හි දුවිධා තථා.

1041. ඡසු ඨානෙසු මජ්ඣකෙ, කායසක්ඛීති භාජිතා;

උභතොභාගවිමුත්තො, අරහත්තෙ පතිට්ඨිතො.

1042. ඉත්ථං වුත්තයානධුර-වුට්ඨානානං විභාගතො;

මග්ගප්ඵලභූමියො ච, සත්තට්ඨාරියපුග්ගලා.

1043. තත්ථ චානුත්තරඤාණං, සච්චානං පටිවෙධකං;

සමුච්ඡෙදප්පහානෙන, ක්ලෙසානුසයසොධනං.

1044. චතුමග්ගවිභාගෙන, වුට්ඨානන්ති පකිත්තිතං;

ඤාණදස්සනවිසුද්ධි, නාම හොති තථාපි ච.

1045. මග්ගො ච පරිජානාති, දුක්ඛං තෙභූමකං තථා;

යථායොගං පජහති, තණ්හාසමුදයම්පි ච.

1046. නිරොධං සච්ඡිකරොති, මග්ගසච්චමනුත්තරං;

භාවනාවීථිමොතිණ්ණො, භාවෙතීති පවුච්චති.

1047. දිට්ඨිග්ගතවිචිකිච්ඡා-සීලබ්බතමසෙසතො;

අපායගමනීයඤ්ච, රාගදොසාදිකත්තයං.

1048. තදෙකට්ඨෙ කිලෙසෙ ච, සහජාතප්පහානතො;

පජහාති සොතාපත්ති-මග්ගො පඨමභූමිකො.

1049. තදෙකට්ඨෙ පජහති, රාගදොසාදිකෙපි ච;

ථූලෙ තු සකදාගාමි-මග්ගො දුතියභූමිකො.

1050. පජහාති අනාගාමි-මග්ගො නිරවසෙසතො;

කාමරාගබ්‍යාපාදෙ ච, තදෙකට්ඨෙ ච සම්භවා.

1051. රූපාරූපරාගමානු-ද්ධච්චාවිජ්ජාති පඤ්චකං;

අග්ගමග්ගො පජහති, ක්ලෙසෙ සෙසෙ ච සබ්බථා.

1052. ඉති සච්චපටිවෙධං, ක්ලෙසක්ඛයඵලාවහං;

මග්ගඤාණං පකාසෙන්ති, විසුද්ධිං සත්තමං බුධා.

1053. ඡබ්බිසුද්ධිකමෙනෙවං, සබ්බථාය විසුද්ධියා;

සත්තමායානුපත්තබ්බං, නිබ්බානන්ති පවුච්චති.

1054. ක්ලෙසක්ඛයකරං තාණං, සංසාරාතික්කමං පරං;

පාරිමං තීරමභයං, සබ්බසඞ්ඛාරනිස්සටං.

1055. තෙනම්මදනිම්මදනං, පිපාසවිනයාදිනා;

ක්ලෙසසංසාරසඞ්ඛාර-පටිපක්ඛනිදස්සිතං.

1056. අජරාමරමච්චන්ත-මනුප්පාදමසඞ්ඛතං;

අනුත්තරමසඞ්ඛාරං, අනන්තමතුලඤ්ච තං.

1057. පරමත්ථමනොපම්මං, සන්ති අප්පටිමං සුඛං;

නිරොධසච්ච නිබ්බානං, එකන්තං අමතං පදං.

1058. සොපාදිසෙසනිබ්බාන-ධාතු චෙව තථාපරා;

අනුපාදිසෙසා චෙති, දුවිධා පරියායතො.

1059. සුඤ්ඤතං චානිමිත්තඤ්ච, තථාපණිහිතන්ති ච;

අත්තාදිගාහාභාවෙන, තිවිධාපි ච භාජිතං.

1060. ක්ලෙසසංසාරසඞ්ඛාර-පච්චනීකවිභාගතො;

භවක්ඛයාදිභෙදෙහි, බහුධාපි පවුච්චති.

1061. තදෙවමච්චුතං ධම්මං, ලොකුත්තරමකාලිකං;

වානාභාවා වානාතීතො, ‘‘නිබ්බාන’’න්ති පකිත්තිතං.

ඉති නිබ්බානවිභාගෙ වුට්ඨානවිසුද්ධිකථා නිට්ඨිතා.

ඡබ්බීසතිමො පරිච්ඡෙදො.

නිට්ඨිතො ච සබ්බථාපි නිබ්බානවිභාගො.