22. පකිණ්ණකකථා

844. ඉත්ථං රූපානමුප්පත්තිං, දීපෙත්වා දානි වුච්චති;

පවත්තිකොසල්ලත්ථාය, තත්ථෙවෙතං පකිණ්ණකං.

845. දුවිධා සන්ධියො තත්ථ, මිස්සාමිස්සවිභාගතො;

තිවිධාපි චෙකචතු-පඤ්චවොකාරභෙදතො.

846. රූපමත්තා අසඤ්ඤීනං, නාමාභාවා අමිස්සිතා;

නාමමත්තා අරූපීනං, රූපාභාවාති ච ද්විධා.

847. කාමාවචරිකා චෙව, රූපාවචරිකාති ච;

දුවිධා මිස්සිතා චෙති, භවන්ති ච චතුබ්බිධා.

848. එකච්චතුවොකාරා ච, අමිස්සා පඤ්ච සන්ධියො;

ඡබ්බීසතිවිධා මිස්සා, පඤ්චවොකාරසන්ධියො.

849. ඉත්ථං භූමිප්පභෙදෙන, එකතිංසවිධාපි ච;

සන්තතිරාසිභෙදෙන, සියුං තිංසවිධා කථං.

850. රූපසන්තතිසීසානං,

රාසයො සත්තවීසති;

වුත්තා කාමෙ වසා තෙසං,

සත්තකා කාමසන්ධියො.

851. වෙදනාසඤ්ඤාසඞ්ඛාර-විඤ්ඤාණක්ඛන්ධසඞ්ගහා;

සබ්බත්ථාපි චතස්සොව, නාමසන්තතියො සියුං.

852. ඉච්චුභින්නං වසා හොන්ති, තත්ථෙකාදසකාදයො;

සන්තතිරාසයො පුබ්බෙ, විභත්තා සත්තකාදයො.

853. එකාදසකදසක-නවට්ඨසත්තකා සියුං;

ඡක්කෙන සද්ධිං විඤ්ඤෙය්‍යා, තස්මා තත්ථ ඡ සඞ්ගහා.

854. අට්ඨ සන්තතියො හොන්ති, රූපලොකෙන මිස්සිතා;

අට්ඨකො රාසි තත්ථෙකො, තස්මා සන්තති වුච්චති.

855. ජීවිතනවකො ත්වෙකො, අසඤ්ඤී පටිසන්ධියං;

අරූපීනං චතස්සොපි, නාමසන්තතියො සියුං.

856. ඉච්චෙකකචතුක්කානං, වසෙන ද්වෙ අමිස්සිතා;

අට්ඨවීසඤ්ච මිස්සාති, තිංසෙව හොන්ති සන්ධියො.

857. එකුප්පාදනිරොධා ච, අමිස්සා තත්ථ රාසයො;

මිස්සිතානං විභාගොයං, යථායොගං කථීයති.

858. උප්පාදට්ඨිතිභඞ්ගානං, වසා තීණි ඛණානිපි;

සමානානෙව නාමානං, එකචිත්තක්ඛණං මතං.

859. තුල්‍යමුප්පාදභඞ්ගානං, රූපානම්පි ඛණද්වයං;

එකූනපඤ්ඤාසමත්තං, ඨිතික්ඛණමුදීරිතං.

860. නාමරූපානමුප්පාදො, භඞ්ගොපි හි සමො මතො;

දන්ධං හි වත්තිකං රූපං, නාමං තු ලහුවත්තිකං.

861. තථා හි රූපෙ තිට්ඨන්තෙ, චිත්තුප්පාදා තු සොළස;

උප්පජ්ජිත්වා පවත්තිත්වා, භිජ්ජන්ති ච ලහුං ලහුං.

862. තස්මා හි එකපඤ්ඤාස-ඛණරූපක්ඛණං තථා;

සත්තරසචිත්තක්ඛණං, තිඛණන්ති ච වුච්චති.

863. චිත්තක්ඛණං හි තිණ්ණන්නං, තත්ථ විඤ්ඤත්තිකද්වයං;

ලක්ඛණත්තයරූපං තු, සලක්ඛණවවත්ථිතං.

864. තස්මා හිත්වා ද්වයඤ්චෙතං, බාවීසතිවිධම්පි ච;

රූපං නාම චතුක්කඤ්ච, සලක්ඛණනියාමිතං.

865. එකුප්පාදනිරොධා ච, තත්ථ තුල්‍යක්ඛණා මතා;

අතුල්‍යක්ඛණධම්මානං, සියා භෙදං යථාරහං.

866. පටිසන්ධික්ඛණෙ ජාතං, තස්මා රූපං තතො පරං;

සත්තරසමචිත්තස්ස, භඞ්ගෙන සහ භිජ්ජති.

867. තස්ස ඨිතික්ඛණෙ ජාතං, රූපම්පි ච තතො පරං;

අට්ඨාරසමචිත්තස්ස, උප්පාදෙ පන භිජ්ජති.

868. තස්ස භඞ්ගක්ඛණෙ ජාතං, රූපම්පි ච තතො පරං;

අට්ඨාරසමචිත්තස්ස, ඨිතිකාලෙසු භිජ්ජති.

869. තථා දුතියචිත්තස්ස, උප්පාදම්හි සමුට්ඨිතං;

අට්ඨාරසමචිත්තස්ස, භඞ්ගෙන සහ භිජ්ජති.

870. ඉති වුත්තනියාමෙන, සජාතික්ඛණතො පරං;

ඨත්වා එකූනපඤ්ඤාස, ඛණානි පුන භිජ්ජති.

871. තස්මා එකූනපඤ්ඤාස, කලාපා සහ වත්තරෙ;

එකො ජායති එකො ච, භිජ්ජතීති ච සබ්බථා.

872. එකසන්තතිසම්බන්ධා, කලාපා සහ කම්මජා;

යථානුපුබ්බඝටිතා, එකපඤ්ඤාස ලබ්භරෙ.

873. සත්තවීස පනිච්චෙවං, කාමෙ ද්වෙ රූපභූමියං;

රූපසන්තතිසීසානං, රාසයො සත්තකාදයො.

874. එකූනතිංස සබ්බෙපි, කම්මජාතා යථාරහං;

එකපඤ්ඤාස ඝටිකා, පවත්තන්ති ඛණෙ ඛණෙ.

875. තත්ථ සන්ධික්ඛණෙ ජාතං, සත්තරසමචෙතසො;

උප්පාදෙ භිජ්ජතිච්චෙවං, වුත්තො අට්ඨකථානයො.

876. තං නයං පටිබාහිත්වා, චිත්තෙන සහ භිජ්ජති;

චිත්තෙන සහ ජාතන්ති, වුත්තමාචරියෙන හි.

877. ආනාපානතක්කචාරා, එකුප්පාදනිරොධකා;

වුත්තා හි යමකෙ කායවචීසඞ්ඛාරනාමකා.

878. චිත්තුප්පාදක්ඛණෙ ජාතා, උතු තස්ස ඨිතික්ඛණෙ;

රූපං ජනෙති තත්ථාපි, උතු භඞ්ගක්ඛණෙපි ච.

879. අනුපුබ්බක්කමෙනෙවං, ජාතං රූපං තථාපරං;

අට්ඨාරසමඋප්පාදට්ඨිතිආදීසු භිජ්ජති.

880. ඉත්ථං කලාපා ඝටිතා, උතුජාහාරජාපි ච;

එකසන්තතිසම්බන්ධා, එකපඤ්ඤාස ලබ්භරෙ.

881. කලාපා චිත්තජා යස්මා, උප්පාදක්ඛණසම්භූතා;

ඝටිකා සහ ලබ්භන්ති, තස්මා සත්තරසෙව තෙ.

882. සබ්බෙපි රූපජනකා, චිත්තුප්පාදෙ යථාසකං;

ජනෙන්ති ඨිතිභඞ්ගෙසු, න ජනෙන්තීති කෙචනා.

883. කුසලාබ්‍යාකතාදීනං, එකුප්පාදනිරොධතා;

ධම්මානං යමකෙ වුත්තා, ඉති පාළි වදන්ති ච.

884. කුසලාදිකසම්බන්ධා, තත්ථ තත්ථ හි දෙසිතා;

ඉති වත්වා පුරෙ වුත්තං, ඉච්ඡන්තාචරියා නයං.

885. ඉච්චෙවං චතුසම්භූතා, රූපසන්තතිරාසයො;

රූපානි ච කලාපා ච, එකාබද්ධා යථාරහං.

886. සුත්තපවත්තමත්තානං, සම්බුද්ධානම්පි පාණිනං;

යාව මරණකාලාපි, පවත්තන්ති නිරන්තරං.

887. ආයුක්ඛයා ච මරණං, තථා කම්මක්ඛයා සියා;

උභින්නං වා ඛයා චාථ, උපච්ඡෙදකකම්මුනා.

888. චතුධාපි මරන්තස්ස, තස්සෙවං තු යථාරහං;

සත්තරසචිත්තක්ඛණමත්තසෙසම්හි ජීවිතෙ.

889. උපරිච්චුතිචිත්තස්ස, සත්තරසමචෙතසො;

ඨිතිකාලමුපාදාය, න තු ජායති කම්මජං.

890. තස්සුප්පාදක්ඛණෙ ජාතං,

රූපඤ්ච චුතියා සහ;

භිජ්ජතීති මතො නාම,

තතො හොති ස පුග්ගලො.

891. චිත්තජාහාරජඤ්චාපි, න ජායති තතො පරං;

උතුසම්භවරූපං තු, අවසිස්සති වා න වා.

892. තතො වුත්තනයෙනෙව, මතසත්තො යථාරහං;

මිස්සාමිස්සාහි සන්ධීහි, පුනදෙවොපපජ්ජති.

893. තතො වුත්තනයෙනෙව, එකූනතිංස කම්මජා;

තෙසමුට්ඨානිකා පඤ්ච, චතුත්තිංස සමිස්සිතා.

894. කලාපා රාසයො හොන්ති, සත්තවීසතිභූමිසු;

ඉති සබ්බපකාරෙන, රූපධම්මා පකාසිතාති.

ඉති රූපවිභාගෙ පකිණ්ණකකථා නිට්ඨිතා.

ද්වාවීසතිමො පරිච්ඡෙදො.

නිට්ඨිතො ච සබ්බථාපි රූපවිභාගො.