වීසතිමො පරිච්ඡෙදො

20. කලාපකථා

754. ඉති වුත්තප්පකාරෙන, සබ්බං රූපම්පි පිණ්ඩිතං;

සහවුත්තිනියාමෙන, එකවීසවිධං කථං.

755. කම්මං චිත්තොතුකාහාරසමුට්ඨානා යථාක්කමං;

නව ඡ චතුරො ද්වෙ ච, කලාපා එකවීසති.

756. ජීවිතඤ්චාවිනිබ්භොග-රූපානි ච යථාක්කමං;

චක්ඛාදිකෙහි යොජෙත්වා, දසකා අට්ඨ දීපිතා.

757. චක්ඛුසොතඝානජිව්හාදසකා ච චතුබ්බිධා;

කායිත්ථිපුම්භාවවත්ථුදසකා ච තථාපරෙ.

758. ජීවිතෙනාවිනිබ්භොගරූපානි නවකන්ති ච;

නවෙතෙ කම්මජා නාම, කලාපා සමුදීරිතා.

759. අවිනිබ්භොගරූපානි, සුද්ධට්ඨකමථාපරං;

කායවිඤ්ඤත්තිනවකං, කායවිඤ්ඤත්තියා සහ.

760. වචීවිඤ්ඤත්තිදසකං, සද්දෙන සහවුත්තිතො;

ලහුතාදෙකාදසකං, තිණ්ණන්නං සහ සම්භවා.

761. කායවිඤ්ඤත්තිලහුතාදීහි ද්වාදසකං භවෙ;

වචීවිඤ්ඤත්තිලහුතාදීහි තෙරසකං තථා.

762. ඉති චිත්තසමුට්ඨානා, කලාපා ඡ පකාසිතා;

රූපාකාරවිකාරම්පි, සඞ්ගහෙත්වා යථාරහං.

763. සුද්ධට්ඨකං තු පඨමං, සද්දෙන නවකං භවෙ;

ලහුතාදෙකාදසකං, ලහුතාදීහි තීහිපි.

764. සද්දෙන ලහුතාදීහි, තථා ද්වාදසකන්ති ච;

කලාපා උතුසම්භූතා, චතුධාව පකිත්තිතා.

765. සුද්ධට්ඨකඤ්ච පඨමං, ආහාරජමථාපරං;

ලහුතාදෙකාදසකං, ඉති ද්වෙ ඔජජා මතා.

766. කලාපානං පරිච්ඡෙදලක්ඛණත්තා විචක්ඛණා;

න කලාපඞ්ගමිච්චාහු, ආකාසං ලක්ඛණානි ච.

767. තත්ථ චෙකූනනවුති, තෙසට්ඨි ච යථාක්කමං;

තාලීසෙකූනවීසා ච, කලාපඞ්ගානි තානි ච.

768. ලක්ඛණාකාසරූපානි, කලාපෙසු තහිං තහිං;

පඤ්ච පඤ්චෙති රූපානි, තිසතං සොළසාධිකං.

769. අගහීතග්ගහණෙන, අට්ඨවීසවිධානිපි;

රූපකොට්ඨාසනාමෙන, පඤ්චවීසති භාවයෙ.

770. භූතත්තයං තු ඵොට්ඨබ්බං, කත්වාපචයසන්තතිං;

ජාතිමෙකඤ්ච කත්වා වා, විනාථ හදයං තහිං.

771. ධම්මසඞ්ගණියං හෙතං, රූපකණ්ඩෙ සරූපතො;

වත්ථුරූපං න නිද්දිට්ඨං, පට්ඨානෙ දෙසිතං තු තං.

772. ද්වෙ සද්දනවකා චෙව,

තයො සුද්ධට්ඨකාපි ච;

ද්වෙ ද්වෙ චිත්තොතුසම්භූතා,

එකො ආහාරජොති ච.

773. තෙසමුට්ඨානිකා පඤ්ච, කම්මජානි නවෙති ච;

රූපරූපවසෙනෙතෙ, කලාපා චුද්දසෙරිතා.

774. දසකෙස්වෙව සඞ්ගය්හ, ජීවිතනවකං තහිං;

භාවද්දසකමෙකං වා, කත්වා වත්ථුං විනා තථා.

775. සද්දා චිත්තොතුජා ද්වෙව, තෙසමුට්ඨානිකා තයො;

සුද්ධට්ඨකා ච සත්තෙව, කම්මජා දසකානි ච.

776. ඡන්නවූතිවිධං තත්ථ, රූපං භාසන්ති පණ්ඩිතා;

අගහීතග්ගහණෙන, අට්ඨාරසවිධං භවෙ.

777. තෙසමෙව කලාපානං, සත්තකච්ඡක්කපඤ්චකා;

චතුක්කා ච තිකද්විකා, එකකා ච යථාරහං.

778. ද්වෙ සත්ත නව ඡ තයො, තයොපි ච යථාක්කමං;

චත්තාරොති චතුත්තිංස, සහවුත්තිකරාසයො.

779. චක්ඛුසොතඝානජිව්හා-කායවත්ථුවසා සියුං;

ඉත්ථිපුම්භාවදසකසහිතා සත්තකා ද්විධා.

780. චක්ඛුසොතඝානහීනා, පච්චෙකං ද්වෙ සභාවකා;

අභාවතො භාවහීනො, ඉත්ථං ඡක්කාපි සත්තධා.

781. චක්ඛුසොතවිහීනා ච,

චක්ඛුඝානවිහීනකා;

සොතඝානවිහීනා ච,

සභාවා ද්වෙ තයො තයො.

782. චක්ඛාදෙකෙකතො හීනා,

තිවිධාපි අභාවතො;

ඉච්චෙවං පඤ්චකා නාම,

නවකා රාසයො සියුං.

783. චක්ඛාදිත්තයහීනාව, එකතො ද්වෙ සභාවකා;

චක්ඛාදිත්තයතො ද්වීහි, තයො හීනා අභාවකා.

784. රූපලොකෙ චක්ඛුසොත-වත්ථුජීවිතනවකා;

චත්තාරොව කලාපාති, චතුක්කා ඡ යථාරහං.

785. ජිව්හාකායවත්ථුවසා,

අභාවො ද්වෙ සභාවකා;

කායභාවවත්ථුවසා,

ඉති හොන්ති තයො තිකා.

786. කායවත්ථුවසෙනෙකො, ද්වෙ ච චිත්තොතුසම්භවා;

සද්දනවකට්ඨකාති, දුකා ච තිවිධා සියුං.

787. ජීවිතනවකඤ්චෙකං, තෙසමුට්ඨානිකානි ච;

සුද්ධට්ඨකානි තීණීති, චත්තාරො එකකා සියුං.

788. චතුත්තිංස පනිච්චෙතෙ, සන්ධියඤ්ච පවත්තියං;

රූපරූපකලාපානං, රාසයො හොන්ති සම්භවා.

789. සත්තති සට්ඨිමිච්චෙවමාදිනා ච යථාරහං;

කලාපරාසිරූපානි, තත්ථ තත්ථ විභාවයෙ.

790. සොළස පඤ්චදසෙතිආදිභෙදවසාපි ච;

අගහීතග්ගහණෙන, තත්ථ තත්ථ විනිද්දිසෙ.

791. චතුචත්තාලීසසතං, කලාපා හොන්ති පිණ්ඩිතා;

ඡබ්බීස තත්ථ රූපානි, සහස්සඤ්ච චතුස්සතං.

792. ඉච්චාපායචතුක්කෙ ච, කාමෙ සුගතිසත්තකෙ;

රූපෙ ච පඤ්චදසකෙ, අසඤ්ඤාපායභූමියං.

793. චතුකොට්ඨාසිකෙස්වෙව, සත්තවීසවිධෙසුපි;

ජාතිට්ඨානෙසු සත්තානං, සන්ධියඤ්ච පවත්තියං.

794. ඉන්ද්‍රියබද්ධසන්තානෙ, තථානින්ද්‍රියකම්හි ච;

බහිසඞ්ඛාරසන්තානෙ, මතකායෙ ච සම්භවා.

795. ලබ්භමානකලාපා ච, කලාපානඤ්ච රාසයො;

තත්ථ විත්ථාරසඞ්ඛෙපා, රූපානං ගණනාපි ච.

796. එත්ථ රූපා අවුත්තා හි, යථාවුත්තානුසාරතො;

විත්ථාරෙත්වාන විඤ්ඤෙය්‍යා, සබ්බථාපි ච විඤ්ඤුනාති.

ඉති රූපවිභාගෙ කලාපකථා නිට්ඨිතා.

වීසතිමො පරිච්ඡෙදො.