13. රාසියොගකථා

441. ඉති රාසිවීථිං ඤත්වා, ලබ්භමානවසා බුධො;

තෙසමෙවාථ යොගම්පි, චිත්තුප්පාදෙසු දීපයෙ.

442. කාමාවචරකුසලස්ස, පඨමද්වයමානසෙ;

සබ්බෙපි රාසයො හොන්ති, යථාසම්භවතො කථං.

443. ඵස්සපඤ්චකරාසී ච, ඣානපඤ්චකරාසි ච;

ඉන්ද්‍රියට්ඨකරාසී ච, මග්ගපඤ්චකරාසි ච.

444. බලසත්තකරාසී ච, හෙතුකම්මපථත්තිකා;

දසාවසෙසා රාසී ච, ලොකපාලදුකාදයො.

445. යෙවාපනකනවකං, නියතුද්ධච්චවජ්ජිතා;

අප්පමඤ්ඤාද්වයඤ්චෙව, තිස්සො විරතියොති ච.

446. ඉති සත්තරසෙවෙතෙ, දෙසිතා ච සරූපතො;

යෙවාපනකරාසී ච, ලබ්භන්තිට්ඨාරසාපි ච.

447. ඡප්පඤ්ඤාස පදානෙත්ථ, දෙසිතානි සරූපතො;

ධම්මා පන සමතිංස, තත්ථ හොන්ති සරූපතො.

448. තානි යෙවාපනකෙහි, පඤ්චසට්ඨි පදානි ච;

ධම්මා චෙකූනතාලීස, භවන්ති පන සම්භවා.

449. තත්ථ ද්වාදස ධම්මා ච, දෙසිතා සවිභත්තිකා;

අවසෙසා තු සබ්බෙපි, අවිභත්තිකනාමකා.

450. එකද්වි ච තිචතුක්ක-ඡසත්තට්ඨානිකා පන;

සත්තවීස ච සත්තෙකො, ද්වෙකෙකො ච යථාක්කමං.

451. නියතා තු චතුත්තිංස, ධම්මාව සහවුත්තිතො;

යථාසම්භවවුත්තිතො, පඤ්චධා නියතා කථා.

452. තත්ථ චානියතෙ සබ්බෙ, ගහෙත්වා ච පහාය ච;

පච්චෙකඤ්ච ගහෙත්වාපි, සත්තධා යොජනක්කමො.

453. සකිමෙකූනතාලීස, චතුත්තිංස යථාක්කමං;

පඤ්චක්ඛත්තුඤ්ච යොජෙය්‍ය, පඤ්චතිංසාති පණ්ඩිතො.

454. රාසයො ච පදානීධ, ධම්මන්තරවිභත්තියො;

සරූපයෙවාපනකෙ, නියතානියතෙ යථා.

455. යොජනානයභෙදඤ්ච, ගණනාසඞ්ගහට්ඨිති;

ලබ්භමානානුමානෙන, සල්ලක්ඛෙන්තො තහිං තහිං.

456. ඤාණං ඤාණවියුත්තම්හි, හිත්වා පීතිං උපෙක්ඛිතෙ;

වෙදනා පරිවත්තෙන්තො, කාමපුඤ්ඤෙ ච සෙසකෙ.

457. මහාක්‍රියෙ ච යොජෙය්‍ය, පහාය විරතිත්තයං;

අප්පමඤ්ඤා ච හිත්වාථ, මහාපාකෙ ච යොජයෙ.

458. තක්කාදිං කමතො හිත්වා, සබ්බත්ථ විරතිත්තයං;

පඤ්චමෙ අප්පමඤ්ඤාය, හිත්වා රූපෙ ච යොජයෙ.

459. හිත්වාප්පමඤ්ඤා යොජයෙ, යථාඣානමනුත්තරෙ;

ලොකුත්තරින්ද්‍රියඤ්චෙව, ගහෙත්වා විරතිත්තයං.

460. ඣානානි චතුතාලීස, සුඛයුත්තානි වත්තරෙ;

උපෙක්ඛිතානි තෙවීස, පඤ්චමජ්ඣානෙ ච සබ්බථා.

461. අප්පමඤ්ඤාවිරතියො, කාමපුඤ්ඤෙසු ලබ්භරෙ;

අප්පමඤ්ඤා රූපජ්ඣාන-චතුක්කෙ ච මහාක්‍රියෙ.

462. ලොකුත්තරෙසු සබ්බත්ථ, සම්භොති විරතිත්තයං;

නත්ථිද්වයම්පි ආරුප්පෙ, මහාපාකෙ ච පඤ්චමෙ.

463. විතක්කාදිත්තයං පඤ්ඤා, පඤ්ච චානියතා චලා;

හානිබුද්ධිවසා සෙසා, න චලන්ති කුදාචනං.

464. බාවීසතිවිධො චෙත්ථ, සඞ්ගහො අනවජ්ජකෙ;

ද්වයද්වයවසා චෙව, ඣානපඤ්චකතොපි ච.

465. ඉති ඤත්වානවජ්ජෙසු, රාසිසඞ්ගහ සම්භවං;

සාවජ්ජෙසුපි විඤ්ඤෙය්‍යා, විඤ්ඤුනා රාසයො කථං.

466. ලොභමූලෙසු පඨමෙ, ඵස්සපඤ්චකරාසි ච;

ඣානපඤ්චකරාසී ච, තථෙවින්ද්‍රියපඤ්චකං.

467. මග්ගබලචතුක්කඤ්ච, හෙතුකම්මපථදුකා;

ලොකනාසකරාසී ච, සමථො සමථද්දුකා.

468. තත්‍රමජ්ඣත්තතං හිත්වා, යෙවාපනකනාමකා;

චත්තාරො චෙති ලබ්භන්ති, තත්ථෙකාදස රාසයො.

469. ද්වත්තිංසෙව පදානෙත්ථ, දෙසිතානි සරූපතො;

තානි යෙවාපනකෙහි, ඡත්තිංසෙව භවන්ති ච.

470. අසම්භින්නපදානෙත්ථ, සමවීසති සම්භවා;

සවිභත්තිකනාමා ච, නව ධම්මා පකාසිතා.

471. එකද්වයතිචතුක්ක-ඡට්ඨානනියතා පන;

එකාදස ඡළෙකා ච, කමෙනෙකො පුනෙකකො.

472. නත්ථෙවානියතා හෙත්ථ, යෙවාපනකනාමකා;

යොජනානයභෙදො ච, තස්මා තත්ථ න විජ්ජති.

473. මානො ච ථිනමිද්ධඤ්ච, ඉස්සා මච්ඡරියං තථා;

කුක්කුච්චමිති සාවජ්ජෙ, ඡළෙවානියතා මතා.

474. මානො දිට්ඨිවියුත්තෙසු, සසඞ්ඛාරෙසු පඤ්චසු;

ථිනමිද්ධං තයො සෙසා, පටිඝද්වයයොගිනො.

475. ඉච්චෙවමට්ඨ සාවජ්ජා, අනවජ්ජට්ඨවීසති;

ඡත්තිංස මානසා සබ්බෙ, හොන්තානියතයොගිනො.

476. තෙහි යුත්තා යථායොගං, එකද්විත්තයපඤ්චහි;

ද්වෙ ද්වාවීසං තයො චෙව, නව චාථ යථාක්කමං.

477. ඉති වුත්තානුසාරෙන, ලබ්භමානවසා පන;

තදඤ්ඤෙසුපි යොජෙය්‍ය, සාවජ්ජෙසු යථාක්කමං.

478. ලොභමූලෙසු ලොභඤ්ච, දොසඤ්ච පටිඝද්වයෙ;

මොහමූලෙ කඞ්ඛුද්ධච්චං, ගහෙත්වා හෙතුරාසියං.

479. දිට්ඨිං දිට්ඨිවියුත්තම්හි, හිත්වා පීතිමුපෙක්ඛිතෙ;

වෙදනං පරිවත්තෙන්තො, දොසමූලෙ ච පණ්ඩිතො.

480. තථා කම්මපථං දිට්ඨිං,

පීතිං ඡන්දඤ්ච මොමුහෙ;

කඞ්ඛිතෙ අධිමොක්ඛඤ්ච,

හිත්වා යොජෙය්‍ය රාසයො.

481. චිත්තස්ස ඨිතිං පත්තාසු, චිත්තස්සෙකග්ගතා පන;

කඞ්ඛිතෙ පරිහීනාව, ඉන්ද්‍රියාදීසු පඤ්චසු.

482. ඉති ද්වාදසධා ඤත්වා, සාවජ්ජෙසුපි සඞ්ගහං;

අහෙතුකෙපි විඤ්ඤෙය්‍යා, යථාසම්භවතො කථං.

483. අට්ඨාරසාහෙතුකෙසු, පඤ්චවිඤ්ඤාණමානසෙ;

ඵස්සපඤ්චකරාසී ච, ඣානට්ඨානදුකං තථා.

484. ඉන්ද්‍රියත්තිකරාසී ච, යෙවාපනකනාමකො;

එකො මනසිකාරොති, චත්තාරො රාසයො සියුං.

485. අසම්භින්නා පනට්ඨෙව, ද්වෙ තත්ථ සවිභත්තිකා;

එකද්වයතිකට්ඨානා, ඡළෙකො ච පුනෙකකො.

486. මනොධාතුත්තිකාහෙතු-පටිසන්ධියුගෙ පන;

විතක්කො ච විචාරො ච, අධිකා ඣානරාසියං.

487. සුඛසන්තීරණෙ පීති, දුතියාවජ්ජනෙ පන;

වීරියඤ්ච සමාධිඤ්ච, ලබ්භතින්ද්‍රියරාසියං.

488. අධිකා හසිතෙ හොන්ති, පීති ච වීරියාදයො;

යෙවාපනාධිමොක්ඛො ච, පඤ්චවිඤ්ඤාණවජ්ජිතෙ.

489. ඉච්චානවජ්ජෙ බාවීස,

සාවජ්ජෙ ද්වාදසාපරෙ;

යොගා හෙතුම්හි පඤ්චෙතෙ,

තාලීසෙකූනකා කථාති.

ඉති චෙතසිකවිභාගෙ රාසියොගකථා නිට්ඨිතා.

තෙරසමො පරිච්ඡෙදො.