9. චෙතසිකසඞ්ගහකථා

315. සත්ත සාධාරණා චෙව, ඡ ධම්මා ච පකිණ්ණකා;

සද්ධාදි පඤ්චවීසෙති, අට්ඨතිංස සමිස්සිතා.

316. කාමාවචරපුඤ්ඤෙසු, ලබ්භන්ති පඨමද්වයෙ;

සත්තතිංසෙව දුතියෙ, පඤ්ඤාමත්තවිවජ්ජිතා.

317. තතියෙ ච යථාවුත්තා, පීතිමත්තවිවජ්ජිතා;

ඡත්තිංසෙව චතුත්ථම්හි, පඤ්ඤාපීතිද්වයං විනා.

318. මහාක්‍රියාසු යුජ්ජන්ති, හිත්වා විරතියො තථා;

පඤ්චතිංස චතුත්තිංසද්වයං තෙත්තිංසකං කමා.

319. ඨපෙත්වා අප්පමඤ්ඤා ච, මහාපාකෙසු යොජිතා;

තෙත්තිංසා චෙව ද්වත්තිංසද්වයෙකත්තිංසකං කමා.

320. අප්පමඤ්ඤා ගහෙත්වාන, හිත්වා විරතියො තථා;

පඤ්චතිංසෙව පඨමෙ, රූපාවචරමානසෙ.

321. විතක්කං දුතියෙ හිත්වා, විචාරඤ්ච තතො පරං;

චතුත්ථෙ පන පීතිඤ්ච, අප්පමඤ්ඤඤ්ච පඤ්චමෙ.

322. යථාවුත්තපකාරාව, චතුත්තිංස යථාක්කමං;

තෙත්තිංස චෙව ද්වත්තිංස, සමතිංසඤ්ච ලබ්භරෙ.

323. පඤ්චමෙන සමානා ච, ඨපෙත්වාරුප්පමානසා;

භූමාරම්මණභෙදඤ්ච, අඞ්ගානඤ්ච පණීතතං.

324. අප්පමඤ්ඤා ඨපෙත්වාන, ගහෙත්වා විරතිත්තයං;

ඡත්තිංසානුත්තරෙ හොන්ති, පඨමජ්ඣානමානසෙ.

325. විතක්කං දුතියෙ හිත්වා, විචාරඤ්ච තතො පරං;

පීතිං හිත්වා චතුත්ථෙ ච, පඤ්චමෙපි ච සබ්බථා.

326. යථාවුත්තප්පකාරාව, පඤ්චතිංස යථාක්කමං;

චතුත්තිංසඤ්ච තෙත්තිංස, තථා තෙත්තිංස චාපරෙ.

327. එවං බාවීසධා භෙදො, අනවජ්ජෙසු සඞ්ගහො;

එකූනසට්ඨිචිත්තෙසු, අට්ඨතිංසානමීරිතො.

328. විරතී අප්පමඤ්ඤා ච, ගහෙත්වා පන සබ්බසො;

එකමෙකං ගහෙත්වා ච, පච්චක්ඛාය ච සබ්බථා.

329. කාමෙසු සත්තධා පුඤ්ඤෙ, චතුධා ච ක්‍රියෙ තථා;

රූපජ්ඣානචතුක්කෙ ච, කත්තබ්බොයම්පි සඞ්ගහො.

330. ඉමිනා පනුපායෙන, සමසත්තති භෙදතො;

අනවජ්ජෙසු විඤ්ඤෙය්‍යො, චිත්තුප්පාදෙසු සඞ්ගහො.

331. ඉති සබ්බප්පකාරෙන, අනවජ්ජවිනිච්ඡයං;

ඤත්වා යොජෙය්‍ය මෙධාවී, සාවජ්ජෙසු ච සඞ්ගහං.

332. සත්ත සාධාරණා චෙව, ඡ ධම්මා ච පකිණ්ණකා;

චත්තාරො පාපසාමඤ්ඤා, ධම්මා සත්තරසෙවිමෙ.

333. එකූනවීසාසඞ්ඛාරෙ, පඨමෙ ලොභදිට්ඨියා;

දුතියෙ ලොභමානෙන, යථාවුත්තා ච තත්තකා.

334. අට්ඨාරස විනා පීතිං, තතියෙ ලොභදිට්ඨියා;

චතුත්ථෙපි විනා පීතිං, ලොභමානෙන තත්තකා.

335. පටිඝෙ ච විනා පීතිං, අසඞ්ඛාරෙ තථෙව තෙ;

ලබ්භන්ති දොසකුක්කුච්ච-මච්ඡරියාහි වීසති.

336. අසඞ්ඛාරෙසු වුත්තා ච, සසඞ්ඛාරෙසු පඤ්චධා;

ථිනමිද්ධෙනෙකවීස, වීස ද්වෙවීසතික්කමා.

337. ඡන්දං පීතිඤ්ච උද්ධච්චෙ, හිත්වා පඤ්චදසෙව තෙ;

හිත්වා විමොක්ඛං කඞ්ඛඤ්ච, ගහෙත්වා කඞ්ඛිතෙ තථා.

338. සත්තවීසතිධම්මානං, ඉති ද්වාදස සඞ්ගහා;

ද්වාදසාපුඤ්ඤචිත්තෙසු, විඤ්ඤාතබ්බා විභාවිනා.

339. හිත්වා ඡානියතෙ ධම්මෙ, ගහෙත්වා ච යථාරහං;

චතුත්තිංසාපි විඤ්ඤෙය්‍යා, සඞ්ගහා තත්ථ විඤ්ඤුනා.

340. ද්වාදසාකුසලෙස්වෙව, ඤත්වා සඞ්ගහමුත්තරං;

ඤෙය්‍යාහෙතුකචිත්තෙසු, සඞ්ගහං කමතො කථං?

341. සත්ත සාධාරණා ඡන්දවජ්ජිතා ච පකිණ්ණකා;

හසිතුප්පාදචිත්තම්හි, ද්වාදසෙව පකාසිතා.

342. වොට්ඨබ්බෙ ච විනා පීතිං, වීරියං සුඛතීරණෙ;

එකාදස යථාවුත්තා, ධම්මා ද්වීසුපි දෙසිතා.

343. මනොධාතුත්තිකෙ චෙව, උපෙක්ඛාතීරණද්වයෙ;

දස හොන්ති යථාවුත්තා, හිත්වා වීරියපීතියො.

344. සත්ත සාධාරණා එව, පඤ්චවිඤ්ඤාණසම්භවා;

ඉච්චාහෙතුකචිත්තෙසු, පඤ්චධා සඞ්ගහො ඨිතො.

345. ඉති චෙතසිකෙ ධම්මෙ, චිත්තෙසු ගණිතෙ පුන;

චිත්තෙන සහ සඞ්ගය්හ, ගණෙය්‍යාපි ච පණ්ඩිතො.

346. අට්ඨතිංසාති යෙ වුත්තා, චිත්තෙන සහ තෙ පුන;

එකූනචත්තාලීසෙති, සබ්බත්ථෙකාධිකං නයෙ.

347. බාවීසෙවං දස ද්වෙ ච, පඤ්ච චෙති යථාරහං;

සඞ්ගහා සම්පයුත්තානං, තාලීසෙකූනකා කථා.

348. විතක්කො ච විචාරො ච, පීති පඤ්ඤා තථා පන;

අප්පමඤ්ඤා විරතීති, නව ධම්මා යථාරහං.

349. ගහෙතබ්බාපනෙතබ්බා, භවන්ති අනවජ්ජකෙ;

පරිවත්තෙති සබ්බත්ථ, වෙදනා තු යථාරහං.

350. ඡන්දාධිමොක්ඛවීරියා, සද්ධාදෙකූනවීසති;

ඵස්සාදයො ඡළෙවාති, න චලන්තට්ඨවීසති.

351. තෙරසෙව තු සාවජ්ජෙ, ඡළෙවාහෙතුමානසෙ;

න චලන්ති දස අඤ්ඤෙ, චුද්දසා ඡ ච සම්භවාති.

ඉති චෙතසිකවිභාගෙ චෙතසිකසඞ්ගහකථා නිට්ඨිතා.

නවමො පරිච්ඡෙදො.