8. චෙතසිකසම්පයොගකථා

286. ඉති චිත්තවිධිං ඤත්වා, ද්වෙපඤ්ඤාස විභාවිනා;

ඤෙය්‍යා චෙතසි සම්භූතා, ධම්මා චෙතසිකා කථං.

287. ඵස්සො ච වෙදනා සඤ්ඤා, චෙතනෙකග්ගතා තථා;

ජීවිතං මනසිකාරො, සත්ත සාධාරණා ඉමෙ.

288. විතක්කො ච විචාරො ච, පීති ච වීරියං තථා;

ඡන්දො ච අධිමොක්ඛො ච, ඡ පකිණ්ණකනාමකා.

289. පුඤ්ඤාපුඤ්ඤෙසු පාකෙසු, ක්‍රියාසු ච යථාරහං;

මානසෙසු පවත්තන්ති, විප්පකිණ්ණා පකිණ්ණකා.

290. සද්ධා සතින්ද්‍රියඤ්චෙව, හිරොත්තප්පබලද්වයං;

අලොභො ච අදොසො ච, පඤ්ඤා මජ්ඣත්තතාපි ච.

291. අට්ඨෙතෙ උත්තමා නාම, ධම්මා උත්තමසාධනා;

නිවජ්ජාති පවුච්චන්ති, යුගළා ඡ තතොපරෙ.

292. පස්සද්ධි කායචිත්තානං, ලහුතා මුදුතා තථා;

කම්මඤ්ඤතා ච පාගුඤ්ඤ-තා ච උජුකතාති ච.

293. අප්පමඤ්ඤාද්වයං නාම, කරුණාමුදිතා සියුං;

සම්මාවාචා ච කම්මන්තා-ජීවා ච විරතිත්තයං.

294. පඤ්චවීස පනිච්චෙතෙ, අනවජ්ජා යථාරහං;

පාපාහෙතුකමුත්තෙසු, අනවජ්ජෙසු ජායරෙ.

295. ලොභො දොසො ච මොහො ච,

මානො දිට්ඨි ච සංසයො;

ථිනමිද්ධඤ්ච උද්ධච්චං,

කුක්කුච්චඤ්ච තථා දස.

296. අහිරීකමනොත්තප්පං, ඉස්සා මච්ඡරියන්ති ච;

හොන්ති චුද්දස සාවජ්ජා, සාවජ්ජෙස්වෙව සම්භවා.

297. ද්වෙපඤ්ඤාස චතුද්ධෙවං, ධම්මා චෙතසිකා ඨිතා;

තෙසං දානි පවක්ඛාමි, සම්පයොගඤ්ච සඞ්ගහං.

298. සත්ත සාධාරණා සබ්බ-චිත්තසාධාරණා තතො;

චිත්තෙන සද්ධි අට්ඨන්නං, විප්පයොගො න කත්ථචි.

299. විතක්කො පඤ්චවිඤ්ඤාණං, දුතියාදිවිවජ්ජිතෙ;

විචාරොපි ච තත්ථෙව, තතියාදිවිවජ්ජිතෙ.

300. සොමනස්සයුතෙ පීති-චතුත්ථජ්ඣානවජ්ජිතෙ;

වීරියං පඨමාවජ්ජ-විපාකාහෙතුවජ්ජිතෙ.

301. ඡන්දො සම්භොති සබ්බත්ථ, මොමූහාහෙතුවජ්ජිතෙ;

අධිමොක්ඛො විචිකිච්ඡා-පඤ්චවිඤ්ඤාණවජ්ජිතෙ.

302. ඡසට්ඨි පඤ්චපඤ්ඤාස, සත්තති චෙව සොළස;

වීසතෙකාදසෙවාථ, පකිණ්ණකවිවජ්ජිතා.

303. මානසා පඤ්චපඤ්ඤාස, සවිතක්කා ඡසට්ඨි ච;

සවිචාරෙකපඤ්ඤාස, සප්පීතිකමනා තථා.

304. තෙසත්තති සවීරියා, සඡන්දෙකූනසත්තති;

සාධිමොක්ඛා පවුච්චන්ති, අට්ඨසත්තති මානසා.

305. පඤ්ඤාප්පමඤ්ඤාවිරතී, හිත්වා එකූනසට්ඨිසු;

පාපාහෙතුකමුත්තෙසු, සද්ධාදෙකූනවීසති.

306. ද්විහෙතුකාහෙතුපාපවජ්ජිතෙසු සමාසතො;

පඤ්ඤා තු ජායතෙ සත්තචත්තාලීසෙසු සබ්බථා.

307. මහාක්‍රියාකාමපුඤ්ඤ-රූපජ්ඣානෙසු ජායරෙ;

අප්පමඤ්ඤාට්ඨවීසෙසු, හිත්වා ඣානං තු පඤ්චමං.

308. ලොකුත්තරෙසු සබ්බත්ථ, සහෙව විරතිත්තයං;

කාමපුඤ්ඤෙසු සම්භොති, යථාසම්භවතො විසුං.

309. විරතීඅප්පමඤ්ඤාසු, පඤ්චස්වපි යථාරහං;

කදාචිදෙව සම්භොති, එකෙකොව න චෙකතො.

310. අහිරීකමනොත්තප්පං, මොහඋද්ධච්චමෙව ච;

පාපසාධාරණා නාම, චත්තාරො පාපසම්භවා.

311. ලොභො ච ලොභමූලෙසු, දිට්ඨියුත්තෙසු දිට්ඨි ච;

මානො දිට්ඨිවියුත්තෙසු, දිට්ඨිමානා න චෙකතො.

312. දොසමූලෙසු දොසො ච, ඉස්සා මච්ඡරියං තථා;

කුක්කුච්චමිති චත්තාරො, විචිකිච්ඡා තු කඞ්ඛිතෙ.

313. සහෙව ථිනමිද්ධං තු, සසඞ්ඛාරෙසු පඤ්චසු;

ඉති චුද්දස සාවජ්ජා, සාවජ්ජෙස්වෙව නිච්ඡිතා.

314. මානො ච ථිනමිද්ධඤ්ච, සහ වාථ විසුං න වා;

ඉස්සාමච්ඡෙරකුක්කුච්චා, අඤ්ඤමඤ්ඤං විසුං න වාති.

ඉති චෙතසිකවිභාගෙ චෙතසිකසම්පයොගකථා නිට්ඨිතා.

අට්ඨමො පරිච්ඡෙදො.