10. දසමො පරිච්ඡෙදො

සෙසකම්මට්ඨානවිභාගො

1298. බ්‍යාපාදාදීනවං දිස්වා, ඛෙමභාවඤ්ච ඛන්තියං;

අප්පමඤ්ඤා තු භාවෙන්තො, විනෙය්‍ය පටිඝං කථං.

1299. චෙතොසන්තාපනො කොධො,

සම්පසාදවිකොපනො;

විරූපබීභච්ඡකරො,

මුඛවණ්ණප්පධංසනො.

1300. සීලකාලුස්සියුප්පාදො, චිත්තවික්ඛෙපසම්භවො;

පඤ්ඤාපජ්ජොතවිද්ධංසී, පටිපත්තිවිබන්ධකො.

1301. අපායෙකායනො මග්ගො, පාපකණ්ටකබන්ධකො;

ධම්මමග්ගසමුච්ඡෙදී, මග්ගද්වාරපිධානකො.

1302. යසොවණ්ණවිසඞ්ඛාරො, ගුණමූලප්පභඤ්ජකො;

දුක්ඛධම්මසමොධානො, බ්‍යසනොපද්දවාකරො.

1303. දුන්නිමිත්තමිදං ජාතං, සබ්බසම්පත්තිධංසනං;

ධූමකෙතුසමුප්පාදො, සබ්බලොකවිනාසකො.

1304. සබ්බකල්‍යාණධම්මානං, අවමඞ්ගලමුට්ඨිතං;

හිතාරම්භසමුග්ඝාතී, අන්තරායසමාගමො.

1305. සබ්බාකාරපටික්කූලං, සබ්බවිද්දෙසකාරණං;

විපත්තිමුඛමුප්පන්නං, අමිත්තජනපත්ථිතං.

1306. සපත්තකරණං ඝොරං, සබ්බානත්ථවිධායකං;

භයමන්තරතො ජාතං, තං ජනො නාවබුජ්ඣති.

1307. ඛුරධාරං ලිහන්තාව, ගිලන්තාව හුතාසනං;

තිත්තලාබුංව ඛාදන්තා, ගණ්හන්තාදිත්තමායුධං.

1308. බ්‍යාපාදමත්තසම්භව-මත්තඝඤ්ඤාය කෙවලං;

උපලාළෙන්ති දුම්මෙධා, ඝොරමාසීවිසං යථා.

1309. දොසතෙජෙන රුක්ඛොව, සුසිරාරුළ්හපාවකො;

අන්තොනුදය්හමානාපි, විප්ඵන්දන්ති විඝාතිනො.

1310. නාවබුජ්ඣන්ති දුම්මෙධා, චෙතොසඞ්කප්පවායුනා;

උක්කාමුඛාමිවාදිත්ත-මුජ්ජලන්තා පුනප්පුනං.

1311. භයමග්ගසමාරුළ්හා, ඛෙමමග්ගවිරොධිනො;

බ්‍යාපන්නා කිබ්බිසාකිණ්ණා, අත්ථද්වයවිරොධිනො.

1312. අනාථා සල්ලකාවිද්ධා, විසට්ටා අනුසොචිනො;

අන්ධා විය මිගාරඤ්ඤෙ, භමන්ති හතචක්ඛුකා.

1313. අසංවිහිතකම්මන්තා, බාලා කොධවසානුගා;

ඛිප්පං ලක්ඛිං පරිච්චත්තා, යසොභොගෙහි ධංසරෙ.

1314. දුප්පටිප්පාදිතාරම්භා, කොධසඞ්ඛොභමොහිතා;

ධම්මාමතරසස්සාදං, න වින්දන්ති අවිද්දසු.

1315. බහ්වාදීනවමිච්චෙව-මන්තො බ්‍යාධිමිවුට්ඨිතං;

ජාතානලමිවුච්ඡඞ්ගෙ, අජ්ඣුපෙක්ඛන්ති දුජ්ජනා.

1316. චොදයමානා දුක්ඛෙහි, ක්ලෙසාචිණ්ණමලීමහා;

පාපකම්මෙහි පූරෙන්තා, සෙන්ති මච්චුපථෙ චිරං.

1317. තමෙවං පටිසඞ්ඛාය, පටිඝං පන යොනිසො;

වාළමිගංව ධාවන්තං, ආවිසන්තංව රක්ඛසං.

1318. පාවකංව පරිබ්‍යුළ්හං, භායමානස්ස යොගිනො;

සොත්ථිභාවාය ඛෙමන්ත-මුපඤ්ඤත්තං මහෙසිනා.

1319. මාතා කල්‍යාණධම්මානං, ඛමා නාම මහිද්ධිකා;

සමප්පවත්ති සත්තෙසු, සබ්බසම්පත්තිසාධිකා.

1320. කොධානලජලාසෙකො,

සොකොපායාසනාසනං;

ආඝාතසල්ලනිද්ධාරී,

උපනාහවිමොචනං.

1321. වණ්ණකිත්තිසමුට්ඨානං, ගුණමූලාභිසෙවනං;

අපාරුතමුඛංවෙත-මත්ථද්වයසමිද්ධියා.

1322. විඝාතපරියාදාන-මාසවානමසෙසතො;

පටිපස්සම්භනං චෙතො-පීතිකරණචන්දනං.

1323. සබ්බදුක්ඛසමුග්ඝාති, සුඛුපට්ඨානමුත්තමං;

බ්‍යසනොදයවිච්ඡෙදො, භයභෙරවනිග්ගමො.

1324. චෙතොපසාදසන්ධානො, පාසාදිකඵලාවහො;

පවරො බොධිසම්භාරො, නරානරනිසෙවිතො.

1325. පාපකන්තාරනිත්ථාරො, චතුරාපායරොධකො;

ද්වාරාවාපුරණඤ්චෙතං, දෙවලොකූපපත්තියා.

1326. පඤ්ඤාසීලසමාධානං, පටිපත්තිවිසොධනො;

පියඞ්කරො සොම්මභාවො, දුල්ලභො බහුපත්ථිතො.

1327. ක්ලෙසසඞ්ඛොභවික්ඛෙප-විප්ඵන්දපටිබන්ධනං;

තිතික්ඛාගුණමක්ඛාත-මාරක්ඛවිධිමත්තනො.

1328. විහිංසාරතිසාරම්භ-පටිරොධවිමොචනං;

වෙරිකිබ්බිසවිද්ධංසී, ලොකානුග්ගහකාරණං.

1329. ධම්මපජ්ජොතකරණං, සංයොගමලසොධනං;

සම්මොහතිමිරුද්ධාරි, සම්පත්තිපටිපාදනං.

1330. ඉච්චත්තත්ථං පරත්ථඤ්ච, සම්පාදෙත්වා ඛමාපරො;

සාධෙති සබ්බසම්පත්ති-මිධ චෙව පරත්ථ ච.

1331. තිතික්ඛාගුණසම්පන්නො, පාණභූතානුකම්පකො;

අනාකුලිතකම්මන්තො, සොරතො සඛිලො සුචි.

1332. නිවාතො සමිතාචාරො, සුභගො පියදස්සනො;

පටිසඞ්ඛාබලප්පත්තො, ධිතිමා මතිපාටවො.

1333. අක්ඛොභො අධිවාසෙන්තො,

සබ්බානත්ථෙ පරිස්සයෙ;

භීමසඞ්ගාමාවචරො,

හත්ථිනාගොව සොභති.

1334. ඉත්ථං සමන්තතො භද්දං, තිතික්ඛං පච්චවෙක්ඛතො;

පස්සම්භෙති සමුට්ඨාය, ඛමා බ්‍යාපාදසම්භමං.

1335. දිබ්බොසධමිවාතඞ්කං, මෙඝජ්ජවං හුතාසනං;

ඛිප්පමන්තරධාපෙති, තිතික්ඛා කොධමත්තනො.

1336. තතොනෙකගුණොපෙතං, නෙකදොසප්පභඤ්ජනං;

ඛන්තිධම්මමධිට්ඨාය, පසන්නධීරමානසො.

1337. භාවෙය්‍ය පඨමං තාව, මෙත්තාභාවනමුත්තමං;

අත්තානමුපමං කත්වා, සත්තෙසු හිතවුඩ්ඪියා.

1338. සබ්බෙ සත්තා ච පාණා ච, භූතා ජීවා ච පුග්ගලා;

අබ්‍යාපජ්ජා තථාවෙරා, අනීඝා ච සුඛෙධිනො.

1339. විජ්ජාසම්පත්තිභොගෙහි, පවඩ්ඪන්තු යසස්සිනො;

පරිවාරබලප්පත්තා, භයොපද්දවවජ්ජිතා.

1340. සඛිලා සුඛසම්භාසා, අඤ්ඤමඤ්ඤාවිරොධිනො;

මොදන්තු සුහිතා සබ්බෙ, මා කිඤ්චි පාපමාගමා.

1341. සද්ධාපාමොජ්ජබහුලා, දානසීලමහුස්සවා;

ගුණභූසිතසන්තානා, ආයුං පාලෙන්තනාමයං.

1342. සම්මාදිට්ඨිං පුරොධාය, සද්ධම්මපටිපත්තියා;

ආරාධෙන්තු හිතොපාය-මච්චන්තං සුඛසාධනං.

1343. ඉති නානප්පකාරෙන, සත්තෙසු හිතමානසං;

මාතාව පියපුත්තම්හි, පවත්තෙය්‍ය නිරන්තරං.

1344. සිනෙහං පරිවජ්ජෙන්තො, බ්‍යාපාදඤ්ච විනාසයං;

පරිසුද්ධෙන චිත්තෙන, හිතකාමොව කෙවලං.

1345. මෙත්තාය මිත්තෙ මජ්ඣත්තෙ, වෙරිකෙ ච යථාක්කමං;

කරොන්තො සීමසම්භෙදං, අත්තනි ච සමං ඵරෙ.

1346. ආසෙවන්තස්ස තස්සෙවං, හිතාභොගසමාහිතං;

සත්තපඤ්ඤත්තිමාරබ්භ, සමාධියති මානසං.

1347. තතො අනීඝො එකග්ගො, උපසන්තමනොරථො;

ඣානත්තිකං චතුක්කං වා, මෙත්තාචෙතොවිමුත්තියා.

1348. භූමිදෙසදිසාසත්ත-භෙදභින්නෙසු ඔධිසො;

යථාසම්භවමප්පෙති, සබ්බසත්තෙස්වනොධිසො.

1349. තදෙවමෙකසත්තම්හි, පරිච්ඡෙදනියාමතො;

බහුකෙසු ච සත්තෙසු, සබ්බෙසු ච පවත්තති.

1350. තථාසෙවිතසන්තානො,

මෙත්තාචෙතොවිමුත්තියා;

කරුණාභාවනායොග-

මාරභෙය්‍ය තතො පරං.

1351. සත්තානං දුක්ඛිතාකාර-මාවජ්ජිත්වාන යොනිසො;

‘‘අහො දුක්ඛා විමුච්චන්තු, සබ්බෙ සත්තා’’ති චින්තයං.

1352. කථං මාණවකොයඤ්ච, භයභෙරවකම්පිතො;

බ්‍යසනොපද්දවාවිද්ධො, විප්ඵන්දති විඝාතවා.

1353. තථා හෙතෙ විමොසාය, පටිපන්නා විරොධිනො;

සබ්‍යාපජ්ජා විහඤ්ඤන්ති, චෙතොදුක්ඛසමප්පිතා.

1354. අථඤ්ඤෙ පරිදෙවන්ති, විපත්තිවිනිපාතිකා;

පධුපායිකසඞ්කප්පා, සොකොපායාසභාගිනො.

1355. අථාපරෙ පරාභූතා, කාමක්ලෙසවසීකතා;

මොහන්ධකාරපක්ඛන්තා, සත්තා ගච්ඡන්ති දුග්ගතිං.

1356. තෙ තත්ථ කටුකං ඝොරමනුභොන්තා සකං ඵලං;

දුක්ඛසූලසමාවිද්ධා, බාහා පග්ගය්හ කන්දරෙ.

1357. දීඝරත්තාධිමුත්තාය, දෙවලොකසමිද්ධියා;

දෙවකායා විහායන්ති, අකාමා පරිවත්තිනො.

1358. චිරකාලං ජලිත්වාන, සූරියොව නභන්තරෙ;

බ්‍රහ්මානොපි පතන්තෙව, බ්‍රහ්මලොකාපරායණා.

1359. ඛන්ධපඤ්චකමිච්චෙවං, දුක්ඛාගාරං සමුබ්බහං;

නානාගතීසු වික්ඛිත්තං, පාණජාතං විහඤ්ඤති.

1360. අනාථමනයාපන්නං, පරිහානිභයාකුලං;

වාතමණ්ඩලිකක්ඛිත්තපක්ඛීව පරිවත්තති.

1361. ඉති දිස්වාන සුත්වා වා, සම්භාවෙත්වාන වා පුන;

දුක්ඛාපගමමිච්ඡන්තො, දුක්ඛාපගම පත්ථයං.

1362. සුඛිතෙසු ච මෙධාවී, දුක්ඛාකාරමනුස්සරං;

පවත්තෙය්‍ය දයාපන්නො, කරුණාභාවනප්පනං.

1363. ‘‘අහො සත්තා විමුච්චන්තු, දුක්ඛධම්මෙහි සබ්බථා;

සාධු සමෙන්තුපායාසා, සොකා ච පරිදෙවනා.

1364. ‘‘ඛීයන්තු පාපධම්මා ච, පස්සම්භෙන්තාමයා තථා;

සංක්ලෙසා පලිබොධා ච, සමුච්ඡිජ්ජන්තු පාණිනං.

1365. ‘‘බ්‍යාපාදා ච විහායන්තු, විනිවත්තන්තුපද්දවා;

බ්‍යසනානි විනස්සන්තු, විගච්ඡන්තු විපත්තියො.

1366. ‘‘විහෙසා ච විඝාතා ච, ඛීයන්තු භයභෙරවා;

පටික්කමන්තු විස්සට්ඨා, සොත්ථිං පස්සන්තු පාණිනො’’.

1367. ඉච්චෙවමනුකම්පන්තො, සබ්බසත්තෙපි සබ්බථා;

සබ්බදුක්ඛසමුග්ඝාතං, පත්ථෙන්තො කරුණායති.