2. දුතියො පරිච්ඡෙදො

ලක්ඛණරසුපට්ඨානවිභාගො

67. සභාවො ලක්ඛණං නාම, කිච්චසම්පජ්ජනා රසො;

ගය්හාකාරො උපට්ඨානං, පදට්ඨානං තු පච්චයො.

68. අත්තුපලද්ධිසඞ්ඛාතා, සම්පත්තා ච පනත්ථතො;

ලක්ඛණරසුපට්ඨානා, වොහාරාභොගභෙදිතා.

69. තෙපඤ්ඤාසසභාවෙසු, තස්මා භෙදං යථාරහං;

ලක්ඛණාදිප්පකාරෙහි, පවක්ඛාමි ඉතො පරං.

70. චින්තෙතීති භවෙ චිත්තං, චින්තනමත්තමෙව වා;

සම්පයුත්තාථ වා තෙන, චින්තෙන්තීති ච ගොචරං.

71. ඵුසතීති භවෙ ඵස්සො, ඵුසනං වාථ කෙවලං;

සම්පයුත්තාථ වා තෙන, ඵුසන්තීති ච ගොචරං.

72. එවං කත්තරි භාවෙ ච, කරණෙ ච යථාරහං;

තෙපඤ්ඤාසසභාවෙසු, සද්දනිබ්බචනං නයෙ.

73. ආලම්බණමනං චිත්තං, තංවිජානනලක්ඛණං;

සහජාධිට්ඨානරසං, චින්තාකප්පොති ගය්හති.

74. ආලම්බණසමොධානො,

ඵස්සො ඵුසනලක්ඛණො;

සඞ්ඝට්ටනරසො තත්ථ,

සන්නිපාතොති ගය්හති.

75. වෙදනාලම්බණරසා, සා වෙදයිතලක්ඛණා;

ගොචරානුභවරසා, අනුභුත්තීති ගය්හති.

76. ආකාරගහණං සඤ්ඤා, සා සඤ්ජානනලක්ඛණා;

නිමිත්තුප්පාදනරසා, උපලක්ඛාති ගය්හති.

77. චෙතනා චිත්තවිප්ඵාරා, සායං බ්‍යාපාරලක්ඛණා;

කම්මන්තායූහනරසා, සංවිධානන්ති ගය්හති.

78. එකග්ගතා අවික්ඛෙපො, සාවිසාහාරලක්ඛණා;

සම්පිණ්ඩනරසා චිත්තං, සමොධානන්ති ගය්හති.

79. යාපනං සහජාතාන-මනුපාලනලක්ඛණං;

ජීවිතං ජීවනරසං, ආයුබන්ධොති ගය්හති.

80. සාරණා මනසීකාරො, සමන්නාහාරලක්ඛණො;

සංයොජනරසො චිත්ත-පටිපත්තීති ගය්හති.

81. සඞ්කප්පනලක්ඛණො තක්කො, සහජාභිනිරොපනො;

ආලම්බාහනනරසො, සන්නිරුජ්ඣොති ගය්හති.

82. විචාරො අනුසන්ධානො, අනුමජ්ජනලක්ඛණො;

චිත්තානුයොජනරසො, අනුපෙක්ඛාති ගය්හති.

83. අධිමොක්ඛො අසංසප්පො, සුසන්නිට්ඨානලක්ඛණො;

නිච්චලාපාදනරසො, දළ්හවුත්තීති ගය්හති.

84. වීරියං පන වායාමො, මහුස්සාහනලක්ඛණො;

කිච්චාසංසීදනරසො, උපත්ථම්භොති ගය්හති.

85. ආලම්බත්ථිකතා ඡන්දො, කත්තුකාමතලක්ඛණො;

ආලම්බණෙසනරසො, හත්ථාදානන්ති ගය්හති.

86. සහජාතානුඵරණා, සම්පියායනලක්ඛණා;

සම්පීනනරසා පීති, පාමොජ්ජමිති ගය්හති.

87. චෙතොසද්දහනං සද්ධා, භූතොකප්පනලක්ඛණා;

හිතපක්ඛන්දනරසා, අධිමුත්තීති ගය්හති.

88. අසම්මොසා සභාවෙසු, සති ධාරණලක්ඛණා;

ධම්මාපිලාපනරසා, අප්පමාදොති ගය්හති.

89. හිරී ජෙගුච්ඡා පාපෙසු, සා හරායනලක්ඛණා;

හීළසංකොචනරසා, පාපලජ්ජාති ගය්හති.

90. පාපසාරජ්ජමොත්තප්පං, උබ්බෙගුත්තාසලක්ඛණං;

භයසඞ්කොචනරසං, අවිස්සාසොති ගය්හති.

91. අලොභො අනභිසඞ්ගො, අපරිග්ගහලක්ඛණො;

මුත්තප්පවත්තනරසො, අසංසග්ගොති ගය්හති.

92. අදොසො චිත්තසාඛල්‍යං, අබ්‍යාපජ්ජනලක්ඛණො;

සණ්හප්පවත්තනරසො, සොම්මභාවොති ගය්හති.

93. අමොහො ඛලිතාභාවො, පටිවිජ්ඣනලක්ඛණො;

විසයොභාසනරසො, පටිබොධොති ගය්හති.

94. තත්‍රමජ්ඣත්තතොපෙක්ඛා, සමීකරණලක්ඛණා;

අපක්ඛපාතනරසා, සමවාහොති ගය්හති.

95. පස්සද්ධි කායචිත්තානං, දරථාභාවලක්ඛණා;

අපරිප්ඵන්දනරසා, සීතිභාවොති ගය්හති.

96. ලහුතා කායචිත්තානං, අදන්ධාකාරලක්ඛණා;

අවිත්ථාරරසා සල්ලහුකවුත්තීති ගය්හති.

97. මුදුතා කායචිත්තානං, කක්ඛළාභාවලක්ඛණා;

කිච්චාවිරොධනරසා, අනුකුල්‍යන්ති ගය්හති.

98. කම්මඤ්ඤතා උභින්නම්පි, අලංකිච්චස්ස ලක්ඛණා;

පවත්තිසම්පත්තිරසා, යොගභාවොති ගය්හති.

99. තථා පාගුඤ්ඤතා ද්වින්නං, විසදාකාරලක්ඛණා;

සුඛප්පවත්තනරසා, සෙරිභාවොති ගය්හති.

100. උජුතා කායචිත්තානං, කුටිලාභාවලක්ඛණා;

ජිම්හනිම්මදනරසා, උජුවුත්තීති ගය්හති.

101. සම්මාවාචා වචීසුද්ධි, වාචාසංයමලක්ඛණා;

මිච්ඡාවාචොරමරසා, වචීවෙලාති ගය්හති.

102. සම්මාකම්මං ක්‍රියාසුද්ධං, සම්මාකරණලක්ඛණං;

මිච්ඡාකම්මොරමරසං, ක්‍රියාවෙලාති ගය්හති.

103. සම්මාජීවො විසුද්ධෙට්ඨි, අල්ලිට්ඨාජීවලක්ඛණො;

මිච්ඡාජීවොරමරසො, සම්මාවුත්තීති ගය්හති.

104. කරුණා දීනසත්තෙසු, දුක්ඛාපනයලක්ඛණා;

සොත්ථිතාපත්ථනරසා, අනුකම්පාති ගය්හති.

105. සුඛට්ඨිතෙසු මුදිතා, අනුමොදනලක්ඛණා;

චෙතොවිකාසනරසා, අවිරොධොති ගය්හති.

106. චෙතොසාරජ්ජනා ලොභො, අපරිච්චාගලක්ඛණො;

ආලම්බගිජ්ඣනරසො, අභිලග්ගොති ගය්හති.

107. චෙතොබ්‍යාපජ්ජනං දොසො, සම්පදුස්සනලක්ඛණො;

ආලම්බණඝාතරසො, චණ්ඩික්කමිති ගය්හති.

108. චෙතොසම්මුය්හනං මොහො,

සො සම්මුය්හනලක්ඛණො;

සභාවච්ඡාදනරසො,

අන්ධභාවොති ගය්හති.

109. පාපාජිගුච්ඡාහිරිකං, නිල්ලජ්ජාකාරලක්ඛණං;

පාපොපලාපනරසං, මලග්ගාහොති ගය්හති.

110. අසාරජ්ජනමනොත්තප්පමනුත්තාසනලක්ඛණං;

පාපපක්ඛන්දනරසං, පාගබ්භමිති ගය්හති.

111. දිට්ඨි දළ්හවිපල්ලාසො, සා පරාමාසලක්ඛණා;

තුච්ඡාභිනිවෙසනරසා, මිච්ඡාගාහොති ගය්හති.

112. ‘‘අහස්මී’’ති මඤ්ඤමානො, සො සමුන්නතිලක්ඛණො;

කෙතුසම්පග්ගහරසො, අහංකාරොති ගය්හති.

113. පරසම්පත්තීසු ඉස්සා, අක්ඛමාකාරලක්ඛණා;

චෙතොවිකුචනරසා, විමුඛත්තන්ති ගය්හති.

114. පරිග්ගහෙසු මච්ඡෙරං, සන්නිගූහනලක්ඛණං;

සාමඤ්ඤාසහනරසං, වෙවිච්ඡමිති ගය්හති.

115. චෙතොපහනනං ථීනං, තං සංසීදනලක්ඛණං;

උස්සාහභඤ්ජනරසං, සංඛිත්තත්තන්ති ගය්හති.

116. විඝාතො සහජාතානං, මිද්ධං මොහනලක්ඛණං;

සත්තිසංභඤ්ජනරසං, ආතුරත්තන්ති ගය්හති.

117. උද්ධච්චං චිත්තවික්ඛෙපො, අවූපසමලක්ඛණං;

චෙතොනවට්ඨානරසං, භන්තත්තමිති ගය්හති.

118. විප්පටිසාරො කුක්කුච්චමනුසොචනලක්ඛණං;

අත්තානුසොචනරසං, පච්ඡාතාපොති ගය්හති.

119. කඞ්ඛායනා විචිකිච්ඡා, අසන්නිට්ඨානලක්ඛණා;

අනෙකගාහනරසා, අප්පතිට්ඨාති ගය්හති.

120. ඉච්චෙවං ලක්ඛණාදීහි, විභාවෙය්‍ය විචක්ඛණො;

තෙපඤ්ඤාසසභාවෙසු, සභාවාකාරලක්ඛණං.

121. ලක්ඛණත්ථකුසලා සලක්ඛණෙ,

ලක්ඛණත්ථපරමෙපි කෙවලං;

ලක්ඛණුග්ගහසුඛාය වණ්ණයුං,

ලක්ඛණාදිමුඛතො සලක්ඛණං.

122. අත්ථං තමෙවමනුගම්ම මයෙත්ථ වුත්ත-

මත්ථානමත්ථනයනත්ථමනෙකධාපි;

පත්ථෙය්‍ය මෙත්ථ වචනත්ථනයෙහි ඤාණ-

මත්ථෙසු බුද්ධවචනත්ථනයත්ථිකෙහි.

ඉති නාමරූපපරිච්ඡෙදෙ ලක්ඛණරසුපට්ඨානවිභාගො නාම

දුතියො පරිච්ඡෙදො.