21. එකවීසතිමො පරිච්ඡෙදො

පටිපදාඤාණදස්සනවිසුද්ධිනිද්දෙසො

1298. අට්ඨඤාණවසෙනෙව, සිඛාපක්කා විපස්සනා;

නවමං පටිපදාඤාණ-දස්සනන්ති පවුච්චති.

1299. අට්ඨ ඤාණානි නාමෙත්ථ, වෙදිතබ්බානි විඤ්ඤුනා;

උපක්ලෙසවිනිමුත්තං, ඤාණං සුවිසදං පන.

1300. උදයබ්බයෙ ච භඞ්ගෙ ච, භයෙ ආදීනවෙ තථා;

නිබ්බිදාපස්සනාඤාණං, ඤාණං මුච්චිතුකම්‍යතා.

1301. පටිසඞ්ඛා ච සඞ්ඛාරෙ, උපෙක්ඛාඤාණමට්ඨමං;

ඉමානි අට්ඨ ඤාණානි, නවමං සච්චානුලොමකං.

1302. සච්චානුලොමඤාණන්ති, අනුලොමං පවුච්චති;

තං සම්පාදෙතුකාමෙන, යොගාවචරභික්ඛුනා.

1303. උදයබ්බයඤාණං තං, ආදිං කත්වා පනට්ඨසු;

එතෙසු පන ඤාණෙසු, යොගො කරණියො පන.

1304. යථානුක්කමතො තස්ස, තෙසු ඤාණෙසු අට්ඨසු;

අනිච්චාදිවසෙනෙව, යොගං කත්වා ඨිතස්ස හි.

1305. අනිච්චං දුක්ඛමනත්තාති, සඞ්ඛාරෙ අනුපස්සතො;

අට්ඨන්නං පන ඤාණානං, වසෙන පන යොගිනො.

1306. විපස්සනා සිඛාපත්තා, හොති වුට්ඨානගාමිනී;

සච්චානුලොමඤාණන්ති, අයමෙව පවුච්චති.

1307. සඞ්ඛාරුපෙක්ඛාඤාණං තං, ආසෙවන්තස්ස යොගිනො;

ඉදානි තස්ස මග්ගො ච, සමුප්පජ්ජිස්සතීති හි.

1308. සඞ්ඛාරුපෙක්ඛා සඞ්ඛාරෙ, අනිච්චා දුක්ඛාති වා තථා;

සම්මසිත්වා භවඞ්ගං තු, පුන වොතරතෙව සා.

1309. භවඞ්ගානන්තරං සඞ්ඛාරු-පෙක්ඛාගතනයෙන තු;

අනිච්චාදිවසෙනෙව, සඞ්ඛාරෙ පන ගොචරං.

1310. කුරුමානං මනොද්වාරෙ, ජායතාවජ්ජනං තතො;

භවඞ්ගාවට්ටනං කත්වා, ජාතස්සානන්තරං පන.

1311. සඞ්ඛාරෙ ගොචරං කත්වා, පඨමං ජවනමානසං;

උප්පජ්ජතීති තං චිත්තං, පරිකම්මන්ති වුච්චති.

1312. තදනන්තරමෙවඤ්ඤං, සඞ්ඛාරාරම්මණං පුන;

දුතියං ජවනං හොති, උපචාරන්ති තං මතං.

1313. තදනන්තරං තං හොති, තථා සඞ්ඛාරගොචරං;

තතියං ජවනචිත්තං, අනුලොමන්ති සඤ්ඤිතං.

1314. පුරිමානං පනට්ඨන්නං, ඤාණානං අනුලොමතො;

බොධිපක්ඛියධම්මානං, උද්ධඤ්ච අනුලොමතො.

1315. තෙනෙව තං හි සච්චානුලොමඤාණං පවුච්චති;

ඉදං හි පන සච්චානු-ලොමඤාණං මහෙසිනා.

1316. ‘‘වුට්ඨානගාමිනීයා හි, පරියොසාන’’න්ති භාසිතං;

ඤෙය්‍යං සබ්බපකාරෙන, පරියොසානන්ති ගොත්‍රභු.

1317. ඉතිනෙකෙහි නාමෙහි, කිත්තිතායා මහෙසිනා;

වුට්ඨානගාමිනී සන්තා, පරිසුද්ධා විපස්සනා.

1318. වුට්ඨාතුකාමො සංසාරදුක්ඛපඞ්කා මහබ්භයා;

කරෙය්‍ය සතතං තත්ථ, යොගං පණ්ඩිතජාතිකො.

ඉති අභිධම්මාවතාරෙ පටිපදාඤාණදස්සනවිසුද්ධිනිද්දෙසො නාම

එකවීසතිමො පරිච්ඡෙදො.