22. බාවීසතිමො පරිච්ඡෙදො

ඤාණදස්සනවිසුද්ධිනිද්දෙසො

1319. ඉතො පරං තු භික්ඛුස්ස, හොති ගොත්‍රභුමානසං;

ආවජ්ජනියඨානත්තා, මග්ගචිත්තස්ස තං පන.

1320. න චප්පටිපදාඤාණ-දස්සනං වා තථෙව ච;

ඤාණදස්සනසුද්ධිං වා, භජතෙ න කුදාචනං.

1321. උභින්නමන්තරා එතං, අබ්බොහාරිකමෙව තං;

විපස්සනාය සොතස්මිං, පතිතත්තා විපස්සනා.

1322. පොථුජ්ජනිකගොත්තං වා, අභිභුය්‍ය පවත්තිතො;

ගොත්තං වුච්චති නිබ්බානං, තතො භවති ගොත්‍රභු.

1323. ඤාණං චතූසු මග්ගෙසු, ඤාණදස්සනසුද්ධිකං;

තත්ථ තං පඨමං මග්ගං, සම්පාදෙතුං පනිච්ඡතා.

1324. අඤ්ඤං කිඤ්චිපි කාතබ්බං, භික්ඛුනා තෙන නත්ථි තං;

යඤ්හි තෙන ච කාතබ්බං, සියා තං කතමෙව තු.

1325. අනුලොමාවසානඤ්හි, සූරං තික්ඛං විපස්සනං;

උප්පාදෙන්තෙන තං සබ්බං, කතමෙව ච යොගිනා.

1326. තස්සානුලොමඤාණස්ස, අන්තෙ තු අනිමිත්තකං;

විසඞ්ඛාරං නිරොධඤ්ච, නිබ්බානං අමතං පදං.

1327. ගොචරං කුරුමානං තං, නිබ්බානාරම්මණෙ පන;

පඨමාවජ්ජනඤ්චෙව, පඨමාභොගතාපි ච.

1328. මග්ගස්සානන්තරාදීහි, පච්චයෙහි පනච්ඡහි;

තස්ස පච්චයභාවඤ්ච, සාධයන්තං තතො පන.

1329. විපස්සනාය මුද්ධඤ්හි, සිඛාපත්තාය තාය තං;

උප්පජ්ජති අනාවත්තං-රම්මණං තස්ස ගොත්‍රභු.

1330. එකෙනාවජ්ජනෙනෙව, එකිස්සායෙව වීථියා;

නානාරම්මණතා චානු-ලොමගොත්‍රභුචෙතසං.

1331. ඨත්වා ආවජ්ජනට්ඨානෙ, තමනාවජ්ජනම්පි ච;

මග්ගස්ස පන තං සඤ්ඤං, දත්වා විය නිරුජ්ඣති.

1332. මග්ගොපි තෙන තං දින්නං, අමුඤ්චිත්වාව සඤ්හිතං;

තං ඤාණමනුබන්ධන්තො, ජායතෙ තදනන්තරං.

1333. කදාචිපි අනිබ්බිද්ධපුබ්බං මග්ගො පනෙස හි;

ලොභං දොසඤ්ච මොහඤ්ච, විද්ධංසන්තොව ජායති.

1334. න කෙවලමයං මග්ගො, දොසනාසනමෙව ච;

කරොති අථ ඛොපායද්වාරානිපි පිධෙති ච.

1335. අනාමතග්ගසංසාරවට්ටදුක්ඛමහොදධිං;

අපාරමතිඝොරඤ්ච, සොසෙති ච අසෙසතො.

1336. මිච්ඡාමග්ගං පනට්ඨඞ්ගං, ජායමානො ච උජ්ඣති;

සබ්බවෙරභයානෙත්ථ, නිච්චං වූපසමෙති ච.

1337. බුද්ධස්සොරසපුත්තත්තං, උපනෙති නයං පන;

ආනිසංසෙ අනෙකෙපි, පවත්තයති යොගිනො.

1338. දායකෙනානිසංසානං, අනෙකෙසමනෙන ච;

ආදිමග්ගෙන සංයුත්තං, ඤාණන්ති ඤාණදස්සනං.

පඨමමග්ගඤාණං.

1339. තස්සෙවානන්තරං තස්ස, විපාකා ද්වෙපි තීණි වා;

ඵලචිත්තානි ජායන්තෙ, න ජායන්තෙ තතො පරං.

1340. කෙචි එකඤ්ච ද්වෙ තීණි, චත්තාරීති වදන්ති තු;

න පනෙතං ගහෙතබ්බං, අජානිත්වා වදන්ති තෙ.

1341. එකස්සාසෙවනං නත්ථි, තස්මා ද්වෙ අනුලොමකා;

තෙහි ආසෙවනං ලද්ධා, තතියං හොති ගොත්‍රභු.

1342. චතුත්ථං මග්ගචිත්තං තු,

තස්මා තීණි ඵලානි හි;

අනුලොමා තයො හොන්ති,

චතුත්ථං හොති ගොත්‍රභු.

1343. පඤ්චමං මග්ගචිත්තඤ්ච, ඵලානි ද්වෙ තතො පන;

සත්තචිත්තපරමාව, එකාවජ්ජනවීථි හි.

1344. එත්තාවතා පනෙසො හි, සොතාපන්නොති වුච්චති;

ඵලස්ස පරියොසානෙ, භවඞ්ගොත්තරණං සියා.

1345. තතො භවඞ්ගං ඡින්දිත්වා, මග්ගපෙක්ඛනහෙතුකං;

උප්පජ්ජති මනොද්වාරෙ, ආවජ්ජනමනො පන.

1346. තස්මිං නිරුද්ධෙ මග්ගස්ස, පච්චවෙක්ඛණසඤ්ඤිතා;

ජවනානි හි ජායන්තෙ, සත්තෙව පටිපාටියා.

1347. එසෙව ච නයො ඤෙය්‍යො, ඵලාදීනම්පි පෙක්ඛනෙ;

පච්චවෙක්ඛණඤාණානි, භවන්තෙකූනවීසති.

1348. මග්ගො ඵලං පහීනා ච, කිලෙසා අවසිට්ඨකා;

නිබ්බානඤ්චෙති පඤ්චෙතෙ, පච්චවෙක්ඛණභූමියො.

1349. එවං සො පච්චවෙක්ඛිත්වා, සොතාපන්නොපපත්තියා;

යොගමාරභතෙ ධීරො, දුතියාය ච භූමියා.

1350. ඛන්ධපඤ්චකසඞ්ඛාතං, තං සඞ්ඛාරගතං පුන;

අනිච්චං දුක්ඛමනත්තාති, ඤාණෙන පරිමජ්ජති.

1351. තතො විපස්සනාවීථි-මොගාහති ච තාවදෙ;

තස්සෙවං පටිපන්නස්ස, හෙට්ඨා වුත්තනයෙන තු.

1352. තතො සඞ්ඛාරුපෙක්ඛාය, අවසානෙ තථෙව ච;

එකාවජ්ජනවාරස්මිං, ගොත්‍රභුස්ස අනන්තරං.

1353. බ්‍යාපාදකාමරාගානං, තනුභාවං තු සාධයං;

සකදාගාමිමග්ගොයං, ජායතෙ දුතියො පන.

දුතියමග්ගඤාණං.

1354. ඉමස්සාපි ච ඤාණස්ස, හෙට්ඨා වුත්තනයෙනිධ;

ඵලචිත්තානි ඤෙය්‍යානි, විඤ්ඤුනා ද්වෙපි තීණි වා.

1355. එත්තාවතා පනෙසො හි, සකදාගාමි නාමයං;

සකිදෙව ඉමං ලොකං, ආගන්ත්වාන්තකරො භවෙ.

1356. හෙට්ඨා වුත්තනයෙනෙව, පඤ්චධා පච්චවෙක්ඛණං;

එවං සො පච්චවෙක්ඛිත්වා, සකදාගාමිපත්තියා.

1357. යොගමාරභතෙ ධීරො, තතියාය ච භූමියා;

බ්‍යාපාදකාමරාගානං, පහානාය ච පණ්ඩිතො.

1358. ඛන්ධපඤ්චකසඞ්ඛාතං, තං සඞ්ඛාරගතං පන;

අනිච්චං දුක්ඛමනත්තාති, ඤාණෙන පරිමජ්ජති.

1359. තතො විපස්සනාවීථි-මොගාහති ච තාවදෙ;

තස්සෙවං පටිපන්නස්ස, හෙට්ඨා වුත්තනයෙන තු.

1360. තතො සඞ්ඛාරුපෙක්ඛාය, අවසානෙ තථෙව ච;

එකාවජ්ජනවීථිම්හි, ගොත්‍රභුස්ස අනන්තරං.

1361. බ්‍යාපාදකාමරාගානං, මූලඝාතං තු සාධයං;

තස්සානාගාමිමග්ගොයං, ජායතෙ තතියො පන.

තතියමග්ගඤාණං.

1362. ඉමස්සාපි ච ඤාණස්ස, හෙට්ඨා වුත්තනයෙනිධ;

පවත්ති ඵලචිත්තානං, වෙදිතබ්බා විභාවිනා.

1363. එත්තාවතා පනෙසොපි, හොතිනාගාමි නාමයං;

තත්ථෙව පරිනිබ්බායී, අනාවත්තිසභාවතො.

1364. හෙට්ඨා වුත්තනයෙනෙව, පඤ්චධා පච්චවෙක්ඛණං;

එවං සො පච්චවෙක්ඛිත්වා, අනාගාමිරියසාවකො.

1365. යොගමාරභතෙ ධීරො, චතුත්ථාය ච භූමියා;

පත්තියාරූපරාගාදි-පහානාය ච පණ්ඩිතො.

1366. තථෙව සඞ්ඛාරගතං, අනිච්චාදිවසෙන සො;

පරිවත්තති ඤාණෙන, තථෙව පරිමජ්ජති.

1367. තතො විපස්සනාවීථි-මොගාහති ච තාවදෙ;

තස්සෙවං පටිපන්නස්ස, හෙට්ඨා වුත්තනයෙන තු.

1368. තතො සඞ්ඛාරුපෙක්ඛාය, අවසානෙ තථෙව ච;

එකාවජ්ජනවාරස්මිං, ගොත්‍රභුස්ස අනන්තරං.

1369. තස්සාරහත්තමග්ගොයං,

ජායතෙ තු තතො පරං;

රූපරාගාදිදොසානං,

විද්ධංසාය කරො පන.

චතුත්ථමග්ගඤාණං.

1370. ඉමස්සාපි ච ඤාණස්ස, හෙට්ඨා වුත්තනයෙනිධ;

පවත්ති ඵලචිත්තානං, වෙදිතබ්බා විභාවිනා.

1371. එත්තාවතා පනෙසො හි,

අරහා නාම අට්ඨමො;

අරියො පුග්ගලො හොති,

මහාඛීණාසවො අයං.

1372. අනුප්පත්තසදත්ථො ච,

ඛීණසංයොජනො මුනි;

සදෙවකස්ස ලොකස්ස,

දක්ඛිණෙය්‍යො අනුත්තරො.

1373. එත්තාවතා චතස්සොපි, ඤාණදස්සනසුද්ධියො;

හිතත්ථාය ච භික්ඛූනං, සඞ්ඛෙපෙනෙව දස්සිතා.

1374. සද්ධෙන සම්මා පන භාවනීයා,

අරියාය පඤ්ඤාය ච භාවනාය;

විසුද්ධිකාමෙන තපොධනෙන,

භවක්ඛයං පත්ථයතා බුධෙන.

ඉති අභිධම්මාවතාරෙ ඤාණදස්සනවිසුද්ධිනිද්දෙසො නාම

බාවීසතිමො පරිච්ඡෙදො.