6. කාමදසුත්තං

87. සාවත්ථිනිදානං. එකමන්තං ඨිතො ඛො කාමදො දෙවපුත්තො භගවන්තං එතදවොච – ‘‘දුක්කරං භගවා, සුදුක්කරං භගවා’’ති.

‘‘දුක්කරං වාපි කරොන්ති (කාමදාති භගවා),

සෙඛා සීලසමාහිතා;

ඨිතත්තා අනගාරියුපෙතස්ස,

තුට්ඨි හොති සුඛාවහා’’ති.

‘‘දුල්ලභා භගවා යදිදං තුට්ඨී’’ති.

‘‘දුල්ලභං වාපි ලභන්ති (කාමදාති භගවා),

චිත්තවූපසමෙ රතා;

යෙසං දිවා ච රත්තො ච,

භාවනාය රතො මනො’’ති.

‘‘දුස්සමාදහං භගවා යදිදං චිත්ත’’න්ති.

‘‘දුස්සමාදහං වාපි සමාදහන්ති (කාමදාති භගවා),

ඉන්ද්‍රියූපසමෙ රතා;

තෙ ඡෙත්වා මච්චුනො ජාලං,

අරියා ගච්ඡන්ති කාමදා’’ති.

‘‘දුග්ගමො භගවා විසමො මග්ගො’’ති.

‘‘දුග්ගමෙ විසමෙ වාපි, අරියා ගච්ඡන්ති කාමද;

අනරියා විසමෙ මග්ගෙ, පපතන්ති අවංසිරා;

අරියානං සමො මග්ගො, අරියා හි විසමෙ සමා’’ති.