11. සුනික්ඛිත්තවිමානවත්ථු

1282. ‘‘උච්චමිදං මණිථූණං විමානං, සමන්තතො ද්වාදස යොජනානි;

කූටාගාරා සත්තසතා උළාරා, වෙළුරියථම්භා රුචකත්ථතා සුභා.

1283. ‘‘තත්ථච්ඡසි පිවසි ඛාදසි ච, දිබ්බා ච වීණා පවදන්ති වග්ගුං;

දිබ්බා රසා කාමගුණෙත්ථ පඤ්ච, නාරියො ච නච්චන්ති සුවණ්ණඡන්නා.

1284. ‘‘කෙන තෙතාදිසො වණ්ණො, කෙන තෙ ඉධ මිජ්ඣති;

උප්පජ්ජන්ති ච තෙ භොගා, යෙ කෙචි මනසො පියා.

1285. ‘‘පුච්ඡාමි ‘තං දෙව මහානුභාව, මනුස්සභූතො කිමකාසි පුඤ්ඤං;

කෙනාසි එවං ජලිතානුභාවො, වණ්ණො ච තෙ සබ්බදිසා පභාසතී’’ති.

1286. සො දෙවපුත්තො අත්තමනො, මොග්ගල්ලානෙන පුච්ඡිතො;

පඤ්හං පුට්ඨො වියාකාසි, යස්ස කම්මස්සිදං ඵලං.

1287. ‘‘දුන්නික්ඛිත්තං මාලං සුනික්ඛිපිත්වා, පතිට්ඨපෙත්වා සුගතස්ස ථූපෙ;

මහිද්ධිකො චම්හි මහානුභාවො, දිබ්බෙහි කාමෙහි සමඞ්ගිභූතො.

1288. ‘‘තෙන මෙතාදිසො වණ්ණො,

තෙන මෙ ඉධ මිජ්ඣති;

උප්පජ්ජන්ති ච මෙ භොගා,

යෙ කෙචි මනසො පියා.

1289. ‘‘අක්ඛාමි තෙ භික්ඛු මහානුභාව,

මනුස්සභූතො යමහං අකාසිං;

තෙනම්හි එවං ජලිතානුභාවො,

වණ්ණො ච මෙ සබ්බදිසා පභාසතී’’ති.

සුනික්ඛිත්තවිමානං එකාදසමං.

සුනික්ඛිත්තවග්ගො සත්තමො නිට්ඨිතො.

තස්සුද්දානං –

ද්වෙ දලිද්දා වනවිහාරා, භතකො ගොපාලකණ්ඩකා;

අනෙකවණ්ණමට්ඨකුණ්ඩලී, සෙරීසකො සුනික්ඛිත්තං;

පුරිසානං තතියො වග්ගො පවුච්චතීති.

භාණවාරං චතුත්ථං නිට්ඨිතං.