6. මිත්තාකාළීථෙරීගාථා

92. ‘‘සද්ධාය පබ්බජිත්වාන, අගාරස්මානගාරියං;

විචරිංහං තෙන තෙන, ලාභසක්කාරඋස්සුකා.

93. ‘‘රිඤ්චිත්වා පරමං අත්ථං, හීනමත්ථං අසෙවිහං;

කිලෙසානං වසං ගන්ත්වා, සාමඤ්ඤත්ථං න බුජ්ඣිහං.

94. ‘‘තස්සා මෙ අහු සංවෙගො, නිසින්නාය විහාරකෙ;

උම්මග්ගපටිපන්නාම්හි, තණ්හාය වසමාගතා.

95. ‘‘අප්පකං ජීවිතං මය්හං, ජරා බ්‍යාධි ච මද්දති;

පුරායං භිජ්ජති [ජරාය භිජ්ජතෙ (සී.)] කායො, න මෙ කාලො පමජ්ජිතුං.

96. ‘‘යථාභූතමවෙක්ඛන්තී, ඛන්ධානං උදයබ්බයං;

විමුත්තචිත්තා උට්ඨාසිං, කතං බුද්ධස්ස සාසන’’න්ති.

… මිත්තා කාළී ථෙරී….