12. චන්දාථෙරීගාථා

122. ‘‘දුග්ගතාහං පුරෙ ආසිං, විධවා ච අපුත්තිකා;

විනා මිත්තෙහි ඤාතීහි, භත්තචොළස්ස නාධිගං.

123. ‘‘පත්තං දණ්ඩඤ්ච ගණ්හිත්වා, භික්ඛමානා කුලා කුලං;

සීතුණ්හෙන ච ඩය්හන්තී, සත්ත වස්සානි චාරිහං.

124. ‘‘භික්ඛුනිං පුන දිස්වාන, අන්නපානස්ස ලාභිනිං;

උපසඞ්කම්ම අවොචං [අවොචිං (ක.)], ‘පබ්බජ්ජං අනගාරියං’.

125. ‘‘සා ච මං අනුකම්පාය, පබ්බාජෙසි පටාචාරා;

තතො මං ඔවදිත්වාන, පරමත්ථෙ නියොජයි.

126. ‘‘තස්සාහං වචනං සුත්වා, අකාසිං අනුසාසනිං;

අමොඝො අය්‍යායොවාදො, තෙවිජ්ජාම්හි අනාසවා’’ති.

… චන්දා ථෙරී….

පඤ්චකනිපාතො නිට්ඨිතො.