7. නන්දමාණවපුච්ඡා

1083. ‘‘සන්ති ලොකෙ මුනයො, (ඉච්චායස්මා නන්දො)

ජනා වදන්ති තයිදං කථංසු;

ඤාණූපපන්නං නො මුනිං [මුනි නො (ස්‍යා. ක.)] වදන්ති, උදාහු වෙ ජීවිතෙනූපපන්නං’’.

1084. ‘‘න දිට්ඨියා න සුතියා න ඤාණෙන, (න සීලබ්බතෙන) [( ) නත්ථි සී.-පී පොත්ථකෙසු]

මුනීධ නන්ද කුසලා වදන්ති;

විසෙනිකත්වා අනීඝා නිරාසා, චරන්ති යෙ තෙ මුනයොති බ්‍රූමි’’.

1085. ‘‘යෙ කෙචිමෙ සමණබ්‍රාහ්මණාසෙ, (ඉච්චායස්මා නන්දො)

දිට්ඨස්සුතෙනාපි [දිට්ඨෙන සුතෙනාපි (සී.), දිට්ඨෙ සුතෙනාපි (ස්‍යා. පී. ක.)] වදන්ති සුද්ධිං;

සීලබ්බතෙනාපි වදන්ති සුද්ධිං, අනෙකරූපෙන වදන්ති සුද්ධිං;

කච්චිස්සු තෙ භගවා තත්ථ යතා චරන්තා, අතාරු ජාතිඤ්ච ජරඤ්ච මාරිස;

පුච්ඡාමි තං භගවා බ්‍රූහි මෙ තං’’.

1086. ‘‘යෙ කෙචිමෙ සමණබ්‍රාහ්මණාසෙ, (නන්දාති භගවා)

දිට්ඨස්සුතෙනාපි වදන්ති සුද්ධිං;

සීලබ්බතෙනාපි වදන්ති සුද්ධිං, අනෙකරූපෙන වදන්ති සුද්ධිං;

කිඤ්චාපි තෙ තත්ථ යතා චරන්ති, නාරිංසු ජාතිජරන්ති බ්‍රූමි’’.

1087. ‘‘යෙ කෙචිමෙ සමණබ්‍රාහ්මණාසෙ, (ඉච්චායස්මා නන්දො)

දිට්ඨස්සුතෙනාපි වදන්ති සුද්ධිං;

සීලබ්බතෙනාපි වදන්ති සුද්ධිං, අනෙකරූපෙන වදන්ති සුද්ධිං;

තෙ චෙ මුනි [සචෙ මුනි (සී.)] බ්‍රූසි අනොඝතිණ්ණෙ, අථ කො චරහි දෙවමනුස්සලොකෙ;

අතාරි ජාතිඤ්ච ජරඤ්ච මාරිස, පුච්ඡාමි තං භගවා බ්‍රූහි මෙ තං’’.

1088. ‘‘නාහං සබ්බෙ සමණබ්‍රාහ්මණාසෙ, (නන්දාති භගවා)

ජාතිජරාය නිවුතාති බ්‍රූමි;

යෙ සීධ දිට්ඨංව සුතං මුතං වා, සීලබ්බතං වාපි පහාය සබ්බං;

අනෙකරූපම්පි පහාය සබ්බං, තණ්හං පරිඤ්ඤාය අනාසවාසෙ;

තෙ වෙ නරා ඔඝතිණ්ණාති බ්‍රූමි’’.

1089. ‘‘එතාභිනන්දාමි වචො මහෙසිනො, සුකිත්තිතං ගොතමනූපධීකං;

යෙ සීධ දිට්ඨං ව සුතං මුතං වා, සීලබ්බතං වාපි පහාය සබ්බං;

අනෙකරූපම්පි පහාය සබ්බං, තණ්හං පරිඤ්ඤාය අනාසවාසෙ;

අහම්පි තෙ ඔඝතිණ්ණාති බ්‍රූමී’’ති.

නන්දමාණවපුච්ඡා සත්තමා නිට්ඨිතා.