3. පුණ්ණකමාණවපුච්ඡා

1049. ‘‘අනෙජං මූලදස්සාවිං, (ඉච්චායස්මා පුණ්ණකො)

අත්ථි [අත්ථී (ස්‍යා.)] පඤ්හෙන ආගමං;

කිං නිස්සිතා ඉසයො මනුජා, ඛත්තියා බ්‍රාහ්මණා දෙවතානං;

යඤ්ඤමකප්පයිංසු පුථූධ ලොකෙ, පුච්ඡාමි තං භගවා බ්‍රූහි මෙ තං’’.

1050. ‘‘යෙ කෙචිමෙ ඉසයො මනුජා, (පුණ්ණකාති භගවා)

ඛත්තියා බ්‍රාහ්මණා දෙවතානං;

යඤ්ඤමකප්පයිංසු පුථූධ ලොකෙ, ආසීසමානා පුණ්ණක ඉත්ථත්තං [ඉත්ථභාවං (සී. ස්‍යා.)];

ජරං සිතා යඤ්ඤමකප්පයිංසු’’.

1051. ‘‘යෙ කෙචිමෙ ඉසයො මනුජා, (ඉච්චායස්මා පුණ්ණකො)

ඛත්තියා බ්‍රාහ්මණා දෙවතානං;

යඤ්ඤමකප්පයිංසු පුථූධ ලොකෙ, කච්චිස්සු තෙ භගවා යඤ්ඤපථෙ අප්පමත්තා;

අතාරුං ජාතිඤ්ච ජරඤ්ච මාරිස, පුච්ඡාමි තං භගවා බ්‍රූහි මෙ තං’’.

1052. ‘‘ආසීසන්ති ථොමයන්ති, අභිජප්පන්ති ජුහන්ති; (පුණ්ණකාති භගවා)

කාමාභිජප්පන්ති පටිච්ච ලාභං, තෙ යාජයොගා භවරාගරත්තා;

නාතරිංසු ජාතිජරන්ති බ්‍රූමි’’.

1053. ‘‘තෙ චෙ නාතරිංසු යාජයොගා, (ඉච්චායස්මා පුණ්ණකො)

යඤ්ඤෙහි ජාතිඤ්ච ජරඤ්ච මාරිස;

අථ කො චරහි දෙවමනුස්සලොකෙ, අතාරි ජාතිඤ්ච ජරඤ්ච මාරිස;

පුච්ඡාමි තං භගවා බ්‍රූහි මෙ තං’’.

1054. ‘‘සඞ්ඛාය ලොකස්මි පරොපරානි [පරොවරානි (සී. ස්‍යා.)], (පුණ්ණකාති භගවා)

යස්සිඤ්ජිතං නත්ථි කුහිඤ්චි ලොකෙ;

සන්තො විධූමො අනීඝො නිරාසො, අතාරි සො ජාතිජරන්ති බ්‍රූමී’’ති.

පුණ්ණකමාණවපුච්ඡා තතියා නිට්ඨිතා.