14. පොසාලමාණවපුච්ඡා

1118. ‘‘යො අතීතං ආදිසති, (ඉච්චායස්මා පොසාලො) අනෙජො ඡින්නසංසයො;

පාරගුං සබ්බධම්මානං, අත්ථි පඤ්හෙන ආගමං.

1119. ‘‘විභූතරූපසඤ්ඤිස්ස, සබ්බකායප්පහායිනො;

අජ්ඣත්තඤ්ච බහිද්ධා ච, නත්ථි කිඤ්චීති පස්සතො;

ඤාණං සක්කානුපුච්ඡාමි, කථං නෙය්‍යො තථාවිධො’’.

1120. ‘‘විඤ්ඤාණට්ඨිතියො සබ්බා, (පොසාලාති භගවා) අභිජානං තථාගතො;

තිට්ඨන්තමෙනං ජානාති, විමුත්තං තප්පරායණං.

1121. ‘‘ආකිඤ්චඤ්ඤසම්භවං ඤත්වා, නන්දී සංයොජනං ඉති;

එවමෙතං අභිඤ්ඤාය, තතො තත්ථ විපස්සති;

එතං [එවං (ස්‍යා. ක.)] ඤාණං තථං තස්ස, බ්‍රාහ්මණස්ස වුසීමතො’’ති.

පොසාලමාණවපුච්ඡා චුද්දසමා නිට්ඨිතා.