10. කප්පමාණවපුච්ඡා

1098. ‘‘මජ්ඣෙ සරස්මිං තිට්ඨතං, (ඉච්චායස්මා කප්පො)

ඔඝෙ ජාතෙ මහබ්භයෙ;

ජරාමච්චුපරෙතානං, දීපං පබ්‍රූහි මාරිස;

ත්වඤ්ච මෙ දීපමක්ඛාහි, යථායිදං නාපරං සියා’’.

1099. ‘‘මජ්ඣෙ සරස්මිං තිට්ඨතං, (කප්පාති භගවා)

ඔඝෙ ජාතෙ මහබ්භයෙ;

ජරාමච්චුපරෙතානං, දීපං පබ්‍රූමි කප්ප තෙ.

1100. ‘‘අකිඤ්චනං අනාදානං, එතං දීපං අනාපරං;

නිබ්බානං ඉති [නිබ්බානමීති (සී.)] නං බ්‍රූමි, ජරාමච්චුපරික්ඛයං.

1101. ‘‘එතදඤ්ඤාය යෙ සතා, දිට්ඨධම්මාභිනිබ්බුතා;

න තෙ මාරවසානුගා, න තෙ මාරස්ස පද්ධගූ’’ති [පට්ඨගූති (ස්‍යා. ක.)].

කප්පමාණවපුච්ඡා දසමා නිට්ඨිතා.