9. කූටවිනිච්ඡයිකපෙතවත්ථු

499. ‘‘මාලී කිරිටී කායූරී [කෙයූරී (සී.)], ගත්තා තෙ චන්දනුස්සදා;

පසන්නමුඛවණ්ණොසි, සූරියවණ්ණොව සොභසි.

500. ‘‘අමානුසා පාරිසජ්ජා, යෙ තෙමෙ පරිචාරකා;

දස කඤ්ඤාසහස්සානි, යා තෙමා පරිචාරිකා;

තා [කා (ක.)] කම්බුකායූරධරා, කඤ්චනාවෙළභූසිතා.

501. ‘‘මහානුභාවොසි තුවං, ලොමහංසනරූපවා;

පිට්ඨිමංසානි අත්තනො, සාමං උක්කච්ච [උක්කඩ්ඪ (සී.)] ඛාදසි.

502. ‘‘කිං නු කායෙන වාචාය, මනසා දුක්කුටං කතං;

කිස්ස කම්මවිපාකෙන, පිට්ඨිමංසානි අත්තනො;

සාමං උක්කච්ච ඛාදසී’’ති.

503. ‘‘අත්තනොහං අනත්ථාය, ජීවලොකෙ අචාරිසං;

පෙසුඤ්ඤමුසාවාදෙන, නිකතිවඤ්චනාය ච.

504. ‘‘තත්ථාහං පරිසං ගන්ත්වා, සච්චකාලෙ උපට්ඨිතෙ;

අත්ථං ධම්මං නිරාකත්වා [නිරංකත්වා (ක.) නි + ආ + කර + ත්වා = නිරාකත්වා], අධම්මමනුවත්තිසං.

505. ‘‘එවං සො ඛාදතත්තානං, යො හොති පිට්ඨිමංසිකො;

යථාහං අජ්ජ ඛාදාමි, පිට්ඨිමංසානි අත්තනො.

506. ‘‘තයිදං තයා නාරද සාමං දිට්ඨං, අනුකම්පකා යෙ කුසලා වදෙය්‍යුං;

මා පෙසුණං මා ච මුසා අභාණි, මා ඛොසි පිට්ඨිමංසිකො තුව’’න්ති.

කූටවිනිච්ඡයිකපෙතවත්ථු නවමං.