13. උබ්බරිපෙතවත්ථු

368. අහු රාජා බ්‍රහ්මදත්තො, පඤ්චාලානං රථෙසභො;

අහොරත්තානමච්චයා, රාජා කාලමක්‍රුබ්බථ [රාජා කාලඞ්කරී තදා (සී.)].

369. තස්ස ආළාහනං ගන්ත්වා, භරියා කන්දති උබ්බරී [උප්පරි (ක.)];

බ්‍රහ්මදත්තං අපස්සන්තී, බ්‍රහ්මදත්තාති කන්දති.

370. ඉසි ච තත්ථ ආගච්ඡි, සම්පන්නචරණො මුනි;

සො ච තත්ථ අපුච්ඡිත්ථ, යෙ තත්ථ සුසමාගතා.

371. ‘‘කස්ස ඉදං ආළාහනං, නානාගන්ධසමෙරිතං;

කස්සායං කන්දති භරියා, ඉතො දූරගතං පතිං;

බ්‍රහ්මදත්තං අපස්සන්තී, ‘බ්‍රහ්මදත්තා’ති කන්දති’’.

372. තෙ ච තත්ථ වියාකංසු, යෙ තත්ථ සුසමාගතා;

‘‘බ්‍රහ්මදත්තස්ස භදන්තෙ [භද්දන්තෙ (ක.)], බ්‍රහ්මදත්තස්ස මාරිස.

373. ‘‘තස්ස ඉදං ආළාහනං, නානාගන්ධසමෙරිතං;

තස්සායං කන්දති භරියා, ඉතො දූරගතං පතිං;

බ්‍රහ්මදත්තං අපස්සන්තී, ‘බ්‍රහ්මදත්තා’ති කන්දති’’.

374. ‘‘ඡළාසීතිසහස්සානි, බ්‍රහ්මදත්තස්සනාමකා;

ඉමස්මිං ආළාහනෙ දඩ්ඪා, තෙසං කමනුසොචසී’’ති.

375. ‘‘යො රාජා චූළනීපුත්තො, පඤ්චාලානං රථෙසභො;

තං භන්තෙ අනුසොචාමි, භත්තාරං සබ්බකාමද’’න්ති.

376. ‘‘සබ්බෙ වාහෙසුං රාජානො, බ්‍රහ්මදත්තස්සනාමකා;

සබ්බෙවචූළනීපුත්තා, පඤ්චාලානං රථෙසභා.

377. ‘‘සබ්බෙසං අනුපුබ්බෙන, මහෙසිත්තමකාරයි;

කස්මා පුරිමකෙ හිත්වා, පච්ඡිමං අනුසොචසී’’ති.

378. ‘‘ආතුමෙ ඉත්ථිභූතාය, දීඝරත්තාය මාරිස;

යස්සා මෙ ඉත්ථිභූතාය, සංසාරෙ බහුභාසසී’’ති.

379. ‘‘අහු ඉත්ථී අහු පුරිසො, පසුයොනිම්පි ආගමා;

එවමෙතං අතීතානං, පරියන්තො න දිස්සතී’’ති.

380. ‘‘ආදිත්තං වත මං සන්තං, ඝතසිත්තංව පාවකං;

වාරිනා විය ඔසිඤ්චං, සබ්බං නිබ්බාපයෙ දරං.

381. ‘‘අබ්බහී වත මෙ සල්ලං, සොකං හදයනිස්සිතං;

යො මෙ සොකපරෙතාය, පතිසොකං අපානුදි.

382. ‘‘සාහං අබ්බූළ්හසල්ලාස්මි, සීතිභූතාස්මි නිබ්බුතා;

න සොචාමි න රොදාමි, තව සුත්වා මහාමුනී’’ති.

383. තස්ස තං වචනං සුත්වා, සමණස්ස සුභාසිතං;

පත්තචීවරමාදාය, පබ්බජි අනගාරියං.

384. සා ච පබ්බජිතා සන්තා, අගාරස්මා අනගාරියං;

මෙත්තාචිත්තං අභාවෙසි, බ්‍රහ්මලොකූපපත්තියා.

385. ගාමා ගාමං විචරන්තී, නිගමෙ රාජධානියො;

උරුවෙලා නාම සො ගාමො, යත්ථ කාලමක්‍රුබ්බථ.

386. මෙත්තාචිත්තං ආභාවෙත්වා, බ්‍රහ්මලොකූපපත්තියා;

ඉත්ථිචිත්තං විරාජෙත්වා, බ්‍රහ්මලොකූපගා අහූති.

උබ්බරිපෙතවත්ථු තෙරසමං.

උබ්බරිවග්ගො දුතියො නිට්ඨිතො.