2. තිස්සමෙත්තෙය්‍යමාණවපුච්ඡා
65. ‘‘කොධ සන්තුසිතො ලොකෙ, [ඉච්චායස්මා තිස්සමෙත්තෙය්‍යො]
කස්ස නො සන්ති ඉඤ්ජිතා;
කො උභන්තමභිඤ්ඤාය, මජ්ඣෙ මන්තා න ලිප්පති [න පිම්පති (බහූසු)];
කං බ්‍රූසි මහාපුරිසොති, කො ඉධ සිබ්බිනිමච්චගා’’ති [සිබ්බනිමච්චගා (සී. ස්‍යා.)].
66. ‘‘කාමෙසු බ්‍රහ්මචරියවා, [මෙත්තෙය්‍යාති භගවා]
වීතතණ්හො සදා සතො;
සඞ්ඛාය නිබ්බුතො භික්ඛු, තස්ස නො සන්ති ඉඤ්ජිතා.
67. ‘‘සො උභන්තමභිඤ්ඤාය, මජ්ඣෙ මන්තා න ලිප්පති;
තං බ්‍රූමි මහාපුරිසොති, සො ඉධ සිබ්බිනිමච්චගා’’ති.
තිස්සමෙත්තෙය්‍යමාණවපුච්ඡා දුතියා.