3. පඤ්චායතනකම්මනිබ්බත්තපඤ්හො

3. රාජා ආහ ‘‘භන්තෙ නාගසෙන, යානිමානි පඤ්චායතනානි, කිං නු තානි නානාකම්මෙහි නිබ්බත්තානි, උදාහු එකෙන කම්මෙනා’’ති? ‘‘නානාකම්මෙහි, මහාරාජ, නිබ්බත්තානි, න එකෙන කම්මෙනා’’ති.

‘‘ඔපම්මං කරොහී’’ති. ‘‘තං කිං මඤ්ඤසි, මහාරාජ, එකස්මිං ඛෙත්තෙ නානාබීජානි වප්පෙය්‍යුං, තෙසං නානාබීජානං නානාඵලානි නිබ්බත්තෙය්‍යු’’න්ති? ‘‘ආම, භන්තෙ, නිබ්බත්තෙය්‍යු’’න්ති. ‘‘එවමෙව ඛො, මහාරාජ, යානි යානි පඤ්චායතනානි, තානි තානි නානාකම්මෙහි නිබ්බත්තානි, න එකෙන කම්මෙනා’’ති.

‘‘කල්ලොසි, භන්තෙ නාගසෙනා’’ති.

පඤ්චායතනකම්මනිබ්බත්තපඤ්හො තතියො.