392. සිඞ්ඝපුප්ඵජාතකං (6-2-7)
115. යමෙතං [යමෙකං (පී.)] වාරිජං පුප්ඵං, අදින්නං උපසිඞ්ඝසි;
එකඞ්ගමෙතං ථෙය්‍යානං, ගන්ධථෙනොසි මාරිස.
116. න හරාමි න භඤ්ජාමි, ආරා සිඞ්ඝාමි වාරිජං;
අථ කෙන නු වණ්ණෙන, ගන්ධථෙනොති වුච්චති.
117. යොයං භිසානි ඛණති, පුණ්ඩරීකානි භඤ්ජති;
එවං ආකිණ්ණකම්මන්තො, කස්මා එසො න වුච්චති.
118. ආකිණ්ණලුද්දො පුරිසො, ධාතිචෙලංව මක්ඛිතො;
තස්මිං මෙ වචනං නත්ථි, තඤ්චාරහාමි වත්තවෙ.
119. අනඞ්ගණස්ස පොසස්ස, නිච්චං සුචිගවෙසිනො;
වාලග්ගමත්තං පාපස්ස, අබ්භාමත්තංව ඛායති.
120. අද්ධා මං යක්ඛ ජානාසි, අථො මං අනුකම්පසි;
පුනපි යක්ඛ වජ්ජාසි, යදා පස්සසි එදිසං.
121. නෙව තං උපජීවාමි, නපි තෙ භතකාම්හසෙ [භතකම්හසෙ (සී. පී.), භතිකම්හසෙ (ස්‍යා.)];
ත්වමෙව භික්ඛු ජානෙය්‍ය, යෙන ගච්ඡෙය්‍ය සුග්ගතින්ති.
සිඞ්ඝපුප්ඵ [භිසපුප්ඵ (සී. පී.), උපසිඞ්ඝපුප්ඵ (ස්‍යා.)] ජාතකං සත්තමං.